Read Елизаветинская Библия, 1751 От Луки 20 Bible Online

От Луки 20 - Елизаветинская Библия, 1751 bible

От Луки 20

¹И бысть во един от дний онех, учащу ему люди в церкви и благовествующу, приидоша священницы и книжницы со старцы

²и реша к нему, глаголюще: рцы нам, коею областию сия твориши, или кто есть давый тебе власть сию?

³Отвещав же рече к ним: вопрошу вы и аз единаго словесе, и рцыте ми:

⁴крещение иоанново с небесе ли бе, или от человек?

⁵Они же помышляху в себе, глаголюще, яко аще речем: с небесе, речет: почто убо не веровасте ему?

⁶аще ли же речем: от человек, вси людие камением побиют ны: известно бо бе о иоанне, яко пророк бе.

⁷И отвещаша: не вемы откуду.

⁸Иисус же рече им: ни аз глаголю вам, коею областию сия творю.

⁹Начат же к людем глаголати притчу сию: человек некий насади виноград, и вдаде его делателем, и отиде на лета многа:

¹⁰и во время посла к делателем раба, да от плода винограда дадут ему: делатели же бивше его, послаша тща.

¹¹И приложи послати другаго раба: они же и того бивше и досадивше (ему), послаша тща.

¹²И приложи послати третияго: они же и того уязвльше изгнаша.

¹³Рече же господин винограда: что сотворю? послю сына моего возлюбленнаго, еда како, его видевше, усрамятся.

¹⁴Видевше же его делателе, мышляху в себе, глаголюще: сей есть наследник: приидите, убием его, да наше будет достояние.

¹⁵И изведше его вон из винограда, убиша. Что убо сотворит им господин винограда?

¹⁶Приидет и погубит делатели сия и вдаст виноград инем. Слышавше же рекоша: да не будет.

¹⁷Он же воззрев на них, рече: что убо писаное сие: камень, егоже небрегоша зиждущии, сей бысть во главу угла?

¹⁸всяк падый на камени том, сокрушится: а на немже падет, стрыет его.

¹⁹И взыскаша архиерее и книжницы возложити нань руце в той час и убояшася народа: разумеша бо, яко к ним притчу сию рече.

²⁰И наблюдше послаша лаятели, притворяющих себе праведники быти: да имут его в словеси, во еже предати его началству и области игемонове.

²¹И вопросиша его, глаголюще: Учителю, вемы, яко право глаголеши и учиши, и не на лица зриши, но воистинну пути Божию учиши:

²²достоит ли нам кесареви дань даяти, или ни?

²³Разумев же их лукавство, рече к ним: что мя искушаете?

²⁴покажите ми цату: чий имать образ и надписание? Отвещавше же рекоша: кесарев.

²⁵Он же рече им: воздадите убо, яже кесарева, кесареви, и яже Божия, Богови.

²⁶И не могоша зазрети глагола его пред людьми: и дивишася о ответе его и умолчаша.

²⁷Приступиша же нецыи от саддукей, глаголющии воскресению не быти, вопрошаху его,

²⁸глаголюще: Учителю, моисей написа нам: аще кому брат умрет имый жену, и той безчаден умрет, да брат его поймет жену и возставит семя брату своему:

²⁹седмь убо братий бе: и первый поят жену, умре безчаден:

³⁰и поят вторый жену, и той умре безчаден:

³¹и третий поят ю: такожде же и вси седмь: и не оставиша чад и умроша:

³²послежде же всех умре и жена:

³³в воскресение убо, котораго их будет жена? седмь бо имеша ю жену.

³⁴И отвещав рече им Иисус: сынове века сего женятся и посягают:

³⁵а сподобльшиися век он улучити и воскресение, еже от мертвых, ни женятся, ни посягают:

³⁶ни умрети бо ктому могут: равни бо суть ангелом и Сынове суть Божии, воскресения Сынове суще:

³⁷а яко востают мертвии, и моисей сказа при купине, якоже глаголет Господа Бога авраамля и Бога исаакова и Бога иаковля:

³⁸Бог же несть мертвых, но живых: вси бо тому живи суть.

³⁹Отвещавше же нецыи от книжник рекоша: Учителю, добре рекл еси.

⁴⁰Ктому же не смеяху его вопросити ничесоже. Рече же к ним:

⁴¹како глаголют Христа Сына давидова быти?

⁴²Сам бо давид глаголет в книзе псаломстей: рече Господь Господеви моему: седи о десную мене,

⁴³дондеже положу враги твоя подножие ногама твоима.

⁴⁴Давид убо Господа его нарицает, и како Сын ему есть?

⁴⁵Слышащым же всем людем, рече учеником своим:

⁴⁶внемлите себе от книжник хотящих ходити во одеждах и любящих целования на торжищих и председания на сонмищих и преждевозлежания на вечерях:

⁴⁷иже снедают домы вдовиц и виною далече молятся: сии приимут лишше осуждение.