Read Елизаветинская Библия, 1751 Второзаконие 11 Bible Online

Второзаконие 11 - Елизаветинская Библия, 1751 bible

Второзаконие 11

¹И да возлюбиши Господа Бога твоего, и сохраниши стражбы его и оправдания его и заповеди его и суды его во вся дни.

²И увесте днесь, яко не чада ваша, елицы не сведеша, ниже видеша наказания Господа Бога твоего и величества его, и руки сильныя и мышцы высокия,

³и знамений его и чудес его, елика сотвори посреде египта фараону царю египетску и всей земли его,

⁴и елика сотвори силе египетстей: колесницы их и кони их како потопи вода моря чермнаго, пред лицем их, гонящым им вслед вас, и погуби их Господь Бог до днешняго дне:

⁵и елика сотвори вам в пустыни, дондеже приидосте на место сие:

⁶и елика сотвори дафану и авирону сыном елиава сына рувимля, яже отверзши земля уста своя пожре их, и домы их, и кущы их, и все их имение с ними, среди всего израиля:

⁷яко очи ваши видеста вся дела Господня великая, елика сотвори в вас днесь.

⁸И сохраните вся заповеди его, елики аз заповедаю вам днесь, да живете и умножитеся, и внидете и наследите землю, на нюже вы преходите чрез иордан тамо наследити ю:

⁹да многи дни будете на земли, еюже клятся Господь отцем вашым дати им и семени их по них землю кипящую млеком и медом.

¹⁰Есть бо земля, на нюже вы идете тамо наследити ю, не яко земля египетска есть, отнюдуже изыдосте, егда сеют семя и напаяют ю ногами своими, аки вертоград зелейный:

¹¹земля же, в нюже ты входиши тамо наследити ю, земля нагорная и равная, от дождя небеснаго напаяется водою:

¹²земля, на нюже Господь Бог твой присещает всегда, очи Господа Бога твоего на ней от начала лета и до конца лета.

¹³Аще же слухом послушаете всех заповедий его, яже аз заповедаю тебе днесь, любити Господа Бога твоего и служити ему от всего сердца твоего и от всея души твоея,

¹⁴и даст дождь земли твоей во время ранный и поздный, и собереши жита твоя и вино твое и елей твой:

¹⁵и даст пищу на селех скотом твоим.

¹⁶И ядый и насытився, внемли себе, да не разширится сердце твое, и преступите, и послужите богом иным, и поклонитеся им:

¹⁷и яростию разгневается Господь на вы и затворит небо, и не будет дождя, и земля не даст плода своего, и погибнете вскоре от земли благия, юже Господь даде вам.

¹⁸И вложите словеса сия в сердца ваша и в душу вашу, и наважите я в знамение на руку вашу, и будут непоколебима между очима вашима,

¹⁹и научите сим чада своя глаголати сия, седящу тебе в дому и идущу тебе в пути, и возлежащу ти и востающу ти:

²⁰и напишите я на празех домов ваших и врат ваших,

²¹да умножатся дние ваши и дни сынов ваших на земли, еюже клятся Господь отцем вашым дати им, якоже дние неба на земли.

²²И будет аще слухом послушаете всех заповедий сих, яже аз заповедаю вам днесь творити, любити Господа Бога вашего и ходити во всех путех его и прилепятися к нему,

²³тогда изженет Господь вся языки сия от лица вашего, и одержите языки великия и крепкия паче вас.

²⁴Всякое место, на немже станет стопа ног ваших, вам будет: от пустыни и антиливана, и от реки великия евфрата, и даже до моря, еже на западе, будут пределы ваши:

²⁵никтоже противостанет пред лицем вашим: и трепет ваш и страх ваш возложит Господь Бог ваш на лице всея земли, на нюже аще взыдете, якоже глагола Господь к вам.

²⁶Се, аз даю пред вами днесь благословение и клятву:

²⁷благословение, аще послушаете заповедий Господа Бога вашего, елики аз заповедаю вам днесь:

²⁸и клятву, аще не послушаете заповедий Господа Бога вашего, елики аз заповедаю вам днесь, и совратитеся с пути, егоже заповедах вам, идуще послужити богом иным, ихже не весте.

²⁹И будет егда введет тебе Господь Бог твой в землю, в нюже преходиши тамо наследити ю, да даси благословение на горе гаризин и клятву на горе гевал:

³⁰не се ли сия суть об ону страну иордана, за путем иже на западе солнца, в земли ханаана обитающаго на западе солнца близ галгала у дуба высокаго?

³¹Вы бо преходите иордан, вшедше наследити землю, юже Господь Бог ваш дает вам в жребий вся дни, и приимете ю, и вселитеся в ню:

³²и да сохраните творити вся заповеди его и суды его, яже аз даю пред вами днесь.