Read Елизаветинская Библия, 1751 Второзаконие 12 Bible Online

Второзаконие 12 - Елизаветинская Библия, 1751 bible

Второзаконие 12

¹И сия заповеди и суды, яже снабдите творити на земли, юже Господь Бог отец ваших дает вам в жребий во вся дни, в няже вы жити будете на земли:

²пагубою погубите вся места, в нихже служиша тамо языцы богом своим, яже вы приимете, на горах высоких и холмех и под древом сеновным:

³и да раскопаете требища их и сокрушите столпы их, и дубравы их ссечете, и ваяние богов их сожжете огнем, и погубите имя их от места того.

⁴Да не сотворите тако Господу Богу вашему,

⁵токмо на месте, идеже изберет Господь Бог ваш, во единем от племен ваших, нарещи имя его тамо и призвати, и взыщете, и внидете тамо:

⁶и принесете тамо всесожжения ваша, и жертвы вашя, и начатки ваши, и обеты ваши, и вольная ваша, и исповедания ваша, первенцы волов ваших и овец ваших,

⁷и ясти будете тамо пред Господем Богом вашим и возвеселитеся о всех, на няже возложите руки вашя вы и домове ваши, якоже тя благословил есть Господь Бог твой.

⁸Да не сотворите тамо всех, елика вы творите зде днесь, кийждо угодное пред собою:

⁹не приидосте бо до ныне в покой и в наследие, еже Господь Бог ваш дает вам.

¹⁰И егда прейдете иордан и вселитеся на земли, юже Господь Бог ваш даст в наследие вам, и упокоит вас от всех враг ваших, иже окрест вас, и вселитеся со утверждением:

¹¹и будет место, иже изберет Господь Бог ваш призвати има его тамо, ту принесете вся, елика аз заповедаю вам днесь: всесожжения ваша и жертвы вашя, и десятины вашя и начатки рук ваших, и всяк избран дар ваш, елика обещаете Господеви Богу вашему:

¹²и возвеселитеся пред Господем Богом вашим вы и сынове ваши и дщери ваши, и рабы ваши и рабыни ваши, и левити, иже у врат ваших: яко несть им части ни жребия с вами.

¹³Внемли себе, да не принесеши всесожжений твоих на всяком месте, еже аще узриши,

¹⁴токмо на месте, еже изберет Господь Бог твой, в единем от племен твоих, тамо да принесеши всесожжения твоя и тамо сотвориши вся, елика аз заповедаю тебе днесь.

¹⁵Но токмо всем желанием души твоея да пожреши, и снеси мяса по благословению Господа Бога твоего, еже даде тебе во всяком граде: нечистый при тебе и чистый вкупе да яст я, яко серну, или еленя.

¹⁶Токмо крове да не снесте: на землю пролиете ю, аки воду.

¹⁷Не возможеши ясти в градех твоих десятины пшеницы твоея и вина твоего и елеа твоего, первенцов волов твоих и овец твоих, и всех обетове, елики обещаете, и исповеданий ваших, и начатков рук ваших:

¹⁸токмо пред Господем Богом твоим да снеси я на месте, еже изберет Господь Бог твой себе, ты и сын твой и дщерь твоя, и раб твой и раба твоя, и левит, и пришлец иже во градех твоих, и возвеселишися пред Господем Богом твоим во всех, на няже возложиши руку твою.

¹⁹Внемли себе, да не оставиши левитина во все время, дондеже еси жив на земли.

²⁰Аще же разширит Господь Бог твой пределы твоя, якоже глагола тебе, и речеши: снем мяса, аще вожделеет душа твоя, яко ясти мяса, во всем желании души твоея да снеси мяса.

²¹Аще же далече отстоит место от тебе, иже изберет Господь Бог твой призывати имя его тамо, и заколеши от волов твоих и от овец твоих, яже даст тебе Бог твой, якоже заповедах тебе, и снеси во градех твоих по желанию души твоея.

²²Якоже ястся серна и елень, тако да снеси е: нечистый при тебе, и чистый такожде да снест.

²³Вонми крепце, еже не ясти крове: кровь бо есть душа его: да на снестся душа с мясы:

²⁴да не снесте ея, на землю пролиете ю аки воду:

²⁵да не снеси ю, да благо тебе будет и сыном твоим по тебе во веки, аще сотвориши се, еже добро и угодно есть пред Господем Богом твоим.

²⁶Разве святая твоя, яже аще будут тебе, и обеты твоя взем да приидеши на место, еже изберет Господь Бог твой оное себе призвати имя его тамо:

²⁷и сотвориши всесожжения твоя: мяса да вознесеши на олтарь Господа Бога твоего, кровь же жертв твоих да пролиеши пред степени олтаря Господа Бога твоего, мяса же да снеси.

²⁸Снабди и послушай, и да сотвориши вся словеса, яже аз заповедаю тебе, да благо тебе будет и сыном твоим во веки, аще сотвориши добро и угодно пред Господем Богом твоим.

²⁹Аще же потребит Господь Бог твой языки, в няже входиши ты тамо, наследити землю их, от лица твоего, и приимеши ю в наследие, и вселишися в земли их:

³⁰внемли себе, да не взыщеши последовати им, по потреблении их от лица твоего, не взыщи богов их, глаголя: якоже творят языцы сии богом своим, сотворю и аз:

³¹да не сотвориши Господу Богу твоему тако: мерзостна бо Господеви, яже возненавиде, сотвориша богом своим, яко сыны своя и дщери своя жгут огнем богом своим.

³²Всяко слово, еже аз заповедаю тебе днесь, сие снабди творити: да не приложиши к сему, ни отимеши от него.