Read Елизаветинская Библия, 1751 Второзаконие 17 Bible Online

Второзаконие 17 - Елизаветинская Библия, 1751 bible

Второзаконие 17

¹Да не пожреши Господеви Богу твоему телца или овчате, на немже есть порок, всяк глагол зол: яко мерзость Господеви Богу твоему есть.

²Аще же обрящется у тебе во единем от градов твоих, яже Господь Бог твои дает тебе, муж или жена, иже сотворит лукавое пред Господем Богом твоим, преступити завет его:

³и шедше послужат богом иным и поклонятся им, солнцу, или луне, или всякому яже от красоты небесныя, ихже не повелех тебе:

⁴и возвестится тебе, и взыщеши зело, и се, истинно бысть слово, мерзость сотворися сия во израили:

⁵да изведеши человека того, или жену ту, иже сотвориша дело злое сие, пред двери, и побиете их камением, и да умрут.

⁶При двою свидетелех или при трех да умрет: умираяй да не умрет при единем свидетели:

⁷и рука свидетелей да будет на нем в первых, умертвити его, и рука всех людий послежде: и измите злое от вас самех.

⁸Аще же неудоборешимо слово у тебе в суде между кровию и кровию, и между судом и судом, и между язвою и язвою, и между прением и прением, словеса судная в градех твоих, и востав взыдеши на место, еже изберет Господь Бог твой призвати имя его тамо:

⁹и приидеши к жерцем левитом, и к судии, иже будет в тыя дни, и взыскавше возвестят тебе суд:

¹⁰и сотвориши по словеси, еже возвестят тебе от места, еже изберет Господь Бог твой призывати имя его тамо, и да сохраниши зело творити вся, елика законоположатся тебе:

¹¹по закону и по суду, егоже рекут тебе, сотвориши, да не уклонишися от словесе, еже известят тебе, ни на десно, ни на лево.

¹²И человек, иже сотворит в гордости, еже не послушати жерца предстоящаго служити во имя Господа Бога твоего, или судии, иже в тыя дни будет, да умрет человек той, и да измеши злое от израиля:

¹³и вси людие услышавше убоятся, и не будут нечествовати ктому.

¹⁴Аще же внидеши в землю, юже Господь Бог твой дает тебе в жребий, и приимеши ю, и вселишися на ней, и речеши: поставлю князя над собою, якоже и прочии языцы, иже окрест мене:

¹⁵поставляя да поставиши над собою князя, егоже изберет Господь Бог твой, от братии твоея да поставиши над собою князя, не возможеши поставити над собою князя человека чуждаго, яко не брат твой есть.

¹⁶Обаче да не умножит себе коней, ниже да возвратит людий во египет, яко да не умножит себе коней: Господь же рече вам: не приложите возвратитися путем сим ктому:

¹⁷и да не умножит себе жен, да не превратится сердце его: и сребра и злата да не умножит себе зело.

¹⁸И будет егда сядет на престоле власти своея, да напишет себе второзаконие сие в книзе от жерцев левитов,

¹⁹и будет с ним, и да чтет ю во вся дни жития своего, да научится боятися Господа Бога своего и хранити вся заповеди сия и оправдания сия, творити я:

²⁰да не возвысится сердце его от братии его, да не преступит от заповедий ни на десно, ни на лево яко да будет многа лета во власти своей, той и сыны его с ним, в сынех израилевых.