Read Елизаветинская Библия, 1751 Второзаконие 18 Bible Online

Второзаконие 18 - Елизаветинская Библия, 1751 bible

Второзаконие 18

¹Да не будет жерцем левитом всему племени левиину части ниже жребия со израилем: приношения Господу жребий их, да ядят я:

²жребий же да не будет ему в братии его: Господь сам жребий его, якоже рече ему.

³И сей суд жерцев, яже от людий, от приносящих жертвы, аще телца, аще овцу: и даси жерцу рамо, и челюсти, и утробу:

⁴и начатки пшеницы твоея и вина твоего и елеа твоего, и начаток стрижения овец твоих да даси ему:

⁵яко того избра Господь Бог твой от всех племен твоих предстояти пред Господем Богом твоим, служити и благословити во имя Господне, той и сынове его во вся дни.

⁶Аще же приидет левит от единаго градов ваших, от всех сынов израилевых, идеже той обитает, якоже желает душа его, на место, еже изберет Господь,

⁷да служит имени Господа Бога вашего, якоже и вся братия его левити предстоящии тамо пред Господем:

⁸часть отделеную да яст, кроме продажи яже по отечеству.

⁹Аще же внидеши в землю, юже Господь Бог твой дает тебе, да не навыкнеши творити по мерзостем языков тех:

¹⁰да не обрящется в тебе очищая сына своего и дщерь свою огнем, волхвуя волхвованием и чаруяй и птицеволшебствуяй,

¹¹чародей обавая обаванием, утробоволхвуяй и знаменосмотритель, и вопрошаяй мертвых:

¹²есть бо мерзость Господеви Богу твоему всяк творяй сия: сих бо ради мерзостей потребит я Господь Бог твой от лица твоего.

¹³Совершен да будеши пред Господем Богом твоим.

¹⁴Языцы бо сии, ихже ты наследиши, сии чарований и волхвований послушают: тебе же не тако даде Господь Бог твой.

¹⁵Пророка от братии твоея, якоже мене, возставит тебе Господь Бог твой, того послушайте:

¹⁶по всему, елико просил еси от Господа Бога твоего в хориве в день собрания, глаголюще: да не приложим слышати гласа Господа Бога нашего, и огня великаго сего не увидим по сем, да не измрем.

¹⁷И рече Господь ко мне: право вся, елика глаголаху к тебе:

¹⁸пророка возставлю им от среды братии их, якоже тебе: и вдам слово мое во уста его, и возглаголет им, якоже заповедаю ему:

¹⁹и человек той, иже не послушает словес его, елика возглаголет пророк оный во имя мое, аз отмщу от него:

²⁰обаче пророк, иже вознечествует глаголати во имя мое слово, егоже не повелех ему глаголати, и иже аще возглаголет во имя богов инех, да умрет пророк той.

²¹Аще же речеши в сердцы своем: како познаем слово, егоже не глагола Господь?

²²елика аще возглаголет пророк во имя Господне, и не сбудется, и не случится слово сие, егоже не рече Господь: в нечестии глагола пророк той, не убойтеся его.