Read Елизаветинская Библия, 1751 Второзаконие 2 Bible Online

Второзаконие 2 - Елизаветинская Библия, 1751 bible

Второзаконие 2

¹И возвратившеся воздвигохомся в пустыню, путем моря чермнаго, якоже глагола Господь ко мне: и обходихом гору сиир дни многи.

²И рече Господь ко мне:

³довлеет вам обхождати гору сию: возвратитеся убо к северу:

⁴и людем заповеждь, глаголя: вы пройдите сквозе пределы братии вашея, сынов исавовых, живущих в сиире, и убоятся вас и ужаснутся зело:

⁵не сотворите с ними рати: не дах бо вам от земли их ниже стопы ноги, яко во жребий дах сыном исавовым гору сиир:

⁶сребром пищу купите себе у них и ядите, и воду в меру возмите от них на цене и пийте:

⁷ибо Господь Бог твой благослови тебе во всяком деле руку твоею: разумей, како прошел еси пустыню великую и страшную сию: се, четыредесять лет Господь Бог твой с тобою, и не востребовал еси словесе.

⁸И минухом братию свою сыны исавли, живущыя в сиире, у пути аравскаго от елона и от гесион-гавера, и возвратившеся преидохом путь в пустыню моавлю.

⁹И рече Господь ко мне: не совраждуйтеся моавитом и не сотворите с ними рати: не дах бо вам от земли их во жребий, сыном бо лотовым дах ароир наследити.

¹⁰Оммины прежде седяху на ней, народ велик и мног и крепок якоже енакими:

¹¹рафаины глаголются и сии, якоже и енакими: и моавити прозывают я оммины.

¹²И в сиире седяше хорреи прежде, но сынове исавовы потребиша я и искорениша я от лица своего: и вселишася вместо их, имже образом сотвори израиль земли наследия своего, юже даде Господь им.

¹³Ныне убо вы востаните и воздвигнитеся, и пройдите дебрь заретову.

¹⁴И дни, в няже отидохом от кадис-варни дондеже преидохом дебрь заретову, тридесять и осмь лет, дондеже паде весь род мужей воинских от полка, якоже клятся им Господь Бог.

¹⁵И рука Божия бяше на них, погубити я от полка, дондеже падоша.

¹⁶И бысть внегда падоша вси мужи воинстии умирающе от среды людий,

¹⁷и рече Господь ко мне, глаголя:

¹⁸ты прейдеши днесь пределы моавлими ароир:

¹⁹и пришедше близ сынов амманих, не совраждуйтеся им и не сотворите с ними рати: не дам бо тебе от земли сынов амманих во жребий, яко сыном лотовым дах ю во жребий.

²⁰Земля рафаинска возименуются: рафаини бо на ней прежде живяху: амманитяне же прозывают их зоммин:

²¹язык велик и мног и крепок, якоже и енакими: и погуби я Господь от лица их, и прияша наследие и вселишася вместо их даже до сего дне:

²²якоже сотвориша сыном исавовым живущым в сиире, имже образом потребиша хорреа от лица своего и наследиша их, и вселишася вместо их даже до сего дне:

²³и евее живущии во асирофе даже до газы, и каппадоки изшедшии из каппадокии потребиша я, и вселишася вместо их.

²⁴Ныне убо востаните и воздвигнитеся, и прейдите вы дебрь арноню: се, предах в руце твои сиона царя есевоня аморрейска и землю его: начни наследовати, сотвори с ним рать днешний день:

²⁵начинай даяти трепет твой и страх твой пред лицем всех языков сущих под небесем, иже слышавше имя твое возмятутся, и болезнь приимут от лица твоего.

²⁶И послах послы от пустыни кедамоф к сиону царю есевоню словесы мирными, глаголя:

²⁷да пройду сквозе землю твою: по пути пройду, не совращуся ни на десно, ни на лево:

²⁸пищу на цене даси ми, и ям: и воду на цене даси ми, и пию: точию ногама моима да прейду:

²⁹якоже сотвориша ми сынове исавли живущии в сиире и моавити живущии во ароире, дондеже прейду иордан на землю, юже Господь Бог наш дает нам.

³⁰И не восхоте сион цар есевонь, да пройдем сквозе его, яко ожесточи Господь Бог наш дух его и укрепи сердце его, да предастся в руце твои якоже во днешний день.

³¹И рече Господь ко мне: се, начах предаяти пред лицем твоим сиона царе есевоня аморрейска и землю его, и начинай наследити землю его.

³²И изыде сион царьарь есевонь противу нам сам и вси людие его на брань во иассу:

³³и предаде его Господь Бог наш пред лицем нашим в руце наши: и убихом его, и сыны его и вся люди его:

³⁴и одержихом вся грады его во оно время, и разорихом всяк град, ктому и жены их и дети их не оставихом живы:

³⁵токмо скот пленихом себе, и корысти градов взяхом.

³⁶Из ароира, иже есть при устии водотечи ариони, и град иже есть в дебри, и даже до горы галаадовы, не бысть град уцелевый от нас: вся предаде Господь Бог наш в руце наши:

³⁷токмо в земли сынов амманих не приступахом ко всем прилежащым к водотечи иавокове и ко градом иже в горах, якоже повеле нам Господь Бог наш.