Read Елизаветинская Библия, 1751 Второзаконие 20 Bible Online

Второзаконие 20 - Елизаветинская Библия, 1751 bible

Второзаконие 20

¹Аще же изыдеши на брань на враги твоя, и узриши кони и всадники и люди множайшыя тебе, да не убоишися их: яко Господь Бог твой с тобою, изведый тя из земли египетския.

²И будет егда приближишися к рати, и приступив жрец да возглаголет к людем и речет к ним:

³послушай, израилю, вы исходите днесь на рать ко врагом вашым: да не ослабеет сердце ваше, ни убойтеся, ниже устрашитеся и не уклонитеся от лица их:

⁴яко Господь Бог ваш идый пред вами споборствует вам на враги вашя и спасет вас.

⁵И да рекут книгочия к людем, глаголюще: кий человек создавый храмину нову, и не обнови ея? да идет, и да возвратится в дом свой, да не умрет на рати, и человек ин обновит ю:

⁶и кии человек, иже насади виноград, и не веселися от него? да идет, и возвратится в дом свой, да не умрет на рати, и человек ин возвеселится от него:

⁷и кий человек, иже обручи себе жену, и не понял ю? да идет, и возвратится в дом свой, да не умрет на рати, и ин человек поймет ю.

⁸И да приложат книгочия глаголати к людем, и да рекут: кий человек страшлив и слаб сердцем? да идет, и возвратится в дом свой, да не устрашит сердца брата своего, аки сердце свое.

⁹И будет егда умолкнут книгочия глаголюще к людем, и поставят воеводы воинства вожды людий.

¹⁰Аще же приидеши ко граду воевати нань, и воззовеши я с миром:

¹¹аще убо мирное отвещают ти, и отверзут тебе (град), вси людие обретшиися во граде да будут тебе дань дающе и послушающии тебе:

¹²аще же не покорятся тебе, и сотворят с тобою рать, да обсядеши его,

¹³дондеже предаст я Господь Бог твой в руце твои: да избиеши всяк мужеск пол в нем убийством меча,

¹⁴кроме жен и имения, и вся скоты, и вся елика суть во граде, и все стяжание да плениши себе, и да снеси весь плен врагов твоих, яже Господь Бог твой дает тебе.

¹⁵Тако да сотвориши всем градом, иже суть далече от тебе зело, иже не суть от градов языков сих, ихже Господь Бог дает тебе наследити землю их:

¹⁶от них да не оставите жива всякаго дыхания:

¹⁷но и проклятием проклените их, хеттеа и аморреа, и хананеа и ферезеа, и евеа и иевусеа и гергесеа, якоже заповеда тебе Господь Бог твой:

¹⁸да не научат вас творити всякия мерзости своя, елики твориша богом своим, и согрешите пред Господем Богом вашим.

¹⁹Аще же обсядеши град един дни многи воевати его в приятие себе, да не истребиши садовия его, возложив железо нань, но токмо да яси плод от них, самого же да не посечеши: еда древо, еже в дубраве, человек есть, иже внити от лица твоего в забрала?

²⁰но древо, еже веси, яко не ястся плод его, сие потребиши и посечеши, и сотвориши лествицы на град, иже творит на тя рать, дондеже предастся.