Read Елизаветинская Библия, 1751 Второзаконие 21 Bible Online

Второзаконие 21 - Елизаветинская Библия, 1751 bible

Второзаконие 21

¹Аще же обрящется убиеный на земли, юже Господь Бог дает тебе наследити, лежащь на поли, и не ведят убившаго и:

²да изыдут старцы и судии твои и да измерят до градов, иже окрест убиенаго:

³и будет град приближаяйся убиеному, и да возмут старейшины града того юницу от говяд, еюже не делано, и яже ярма не понесе:

⁴и да изведут старейшины града того юницу в дебрь суху, яже не оранна, ниже насеяна, и да пресекут жилы юницы в дебри:

⁵и да приступят жерцы левити: яко сих избра Господь Бог твой предстояти ему и благословляти во ему его: и во устех их да будет всякое прекословие и всякая язва:

⁶и вси старейшины града того, приближающиися убиеному, да омыют руце над главою юницы, ейже пресечены суть жилы в дебри,

⁷и отвещавше да рекут: руце наши не пролияша крове сея, и очи наши не видеша:

⁸милостив буди людем твоим израилю, ихже извел еси, Господи, из земли египетския, да не будет кровь неповинна на людех твоих израили: и очистится им кровь:

⁹ты же отимеши кровь неповинну от среды себе, аще сотвориши доброе и угодное пред Господем Богом твоим.

¹⁰Аще же изыдеши на брань противу врагом твоим, и предаст я Господь Бог твой в руце твои, и плениши плен от них,

¹¹и узриши в плене добру обличием, и возлюбиши ю, и поймеши ю себе в жену,

¹²и введеши ю внутрь в дом твой, и да обриеши главу ея, и да обрежеши ногти ея,

¹³и да совлечеши ризы пленныя ея с нея: и да сядет в дому твоем, и да плачется отца своего и матере своея месяц дний: и но сем внидеши к ней, и совокупишися с нею, и будет тебе жена.

¹⁴И будет аще не восхощеши ея, да отпустиши ю свободну, продажею же да не продаси ея на цене: да не отринеши ея, понеже смирил еси ю.

¹⁵Аще же будут мужу две жены, едина от них люба, и другая не люба, и породят ему любая и нелюбая, и будет сын перворожденный от нелюбимыя:

¹⁶и будет в оньже день разделит сыном своим имение свое, не возможет первенцем быти сын любимыя, презрев сына нелюбимыя первенца:

¹⁷но сына нелюбимыя за первенца да признает, и даст ему сугубо от всего, еже обрящется ему, яко сей есть начало чад его, и сему достоит первенство.

¹⁸Аще же кому будет сын непокорив и грубитель, не послушаяй гласа отца своего и гласа матере своея, и накажут его, и не послушает их,

¹⁹да возмут его отец его и мати его, и да изведут его пред старейшины града своего и пред врата места своего,

²⁰и да рекут к мужем града своего: сын наш сей непокорив есть и грубитель и не слушает речи нашея, сластолюбствуя пиянствует:

²¹и да побиют его мужие града того камением, и да умрет: и измите злое от себе самих, да и прочии слышавше убоятся.

²²Аще же будет на ком грех, суд смертный, и да умрет, и повесите его на древе,

²³да не пренощует тело его на древе, но во гробе погребите его в тойже день: яко проклят есть от Бога всяк висяй на древе: и да не оскверните земли, юже Господь Бог твой дает тебе во жребий.