Read Елизаветинская Библия, 1751 Второзаконие 23 Bible Online

Второзаконие 23 - Елизаветинская Библия, 1751 bible

Второзаконие 23

¹Да не входит каженик и скопец в сонм Господень.

²Ниже да внидет блудородный во храм Господень до десятаго рода.

³Да не внидет амманитин и моавитин в храм Господень: и даже до десятаго рода да не входит в храм Господень, и даже до века,

⁴понеже не сретоша они вас с хлебы и водою на пути, исходящым вам из земли египетския, и яко наяша на тя валаама сына веорова от месопотамии, да тя прокленет:

⁵и не восхоте Господь Бог твой послушати валаама, и обрати Господь Бог твой клятвы в благословение, зане возлюби тя Господь Бог твой:

⁶да не совещаеши мирная им и полезная им во вся дни твоя во веки.

⁷Да не возгнушаешися идумеанином, яко брат твой есть: да не возгнушаешися египтянином, яко пришлец был еси в земли его:

⁸сынове аще родятся им, в роде третием да внидут в храм Господень.

⁹Аще же изыдеши ополчитися на враги твоя, и да сохранишися от всякаго слова зла.

¹⁰Аще будет у тебе человек, иже не будет чист от излияния его нощию, и да изыдет вне полка, и да не внидет в полк:

¹¹и егда будет к вечеру, да омыет тело свое водою, и зашедшу солнцу да внидет в полк.

¹²И место тебе да будет вне полка, и изыдеши тамо вон:

¹³и рылец да будет тебе за поясом твоим, и будет егда сядеши вне, и да ископаеши им (яму), и навратив покрыеши стыдение твое в ней:

¹⁴яко Господь Бог твой ходит в полце твоем избавляти тя и предати враги твоя в руце твои пред лицем твоим: и да будет полк твой свят, и да не явится у тебе стыдение вещи, и отвратится от тебе.

¹⁵Да не предаси раба господину его, иже прииде к тебе от господина своего:

¹⁶с тобою да обитает, с вами да живет во всяком месте, идеже угодно будет ему: да не оскорбиши его.

¹⁷Да не будет блудница от дщерей израилевых, и да не будет блудник от сынов израилевым.

¹⁸Да не принесеши мзды блудничи, ниже цене песии в дом Господа Бога твоего на всяк обет, яко мерзость суть Господеви Богу твоему и обоя.

¹⁹Да не даси брату твоему в лихву сребра и в лихву пищей и в лихву всякия вещи, емуже аще взаим даси:

²⁰чуждему да даси в лихву, брату же твоему да не даси в лихву, да благословит тя Господь Бог твой во всех делех твоих на земли, в нюже входиши тамо наследити ю.

²¹Аще же обещаеши обет Господеви Богу твоему, да не умедлиши воздати его, яко взыская взыщет Господь Бог твой от тебе, и будет на тебе грех:

²²аще же не восхощеши обещати, несть ти греха.

²³Исходящая на уст твоих сохрани и сотвори, имже образом обещал еси Господеви Богу твоему дар, егоже глаголал еси устами твоими.

²⁴Аще же внидеши на ниву ближняго своего, и собереши в руце свои класы, а серпа да не возложиши на ниву ближняго.

²⁵Аще же внидеши в виноград ближняго своего, да яси гроздие, елико души твоей насытитися, в сосуд же да не вложиши.