Read Елизаветинская Библия, 1751 Второзаконие 26 Bible Online

Второзаконие 26 - Елизаветинская Библия, 1751 bible

Второзаконие 26

¹И будет аще внидеши в землю, юже Господь Бог твой дает тебе в жребий еже наследити ю, и вселишися на ней,

²и да возмеши от начатка плодов земли твоея, юже Господь Бог твой дает тебе в жребий, и вложиши в кошницу, и пойдеши на место, еже изберет Господь Бог твой призывати имя его тамо:

³и приидеши к жерцу, иже будет в тыя дни, и речеши к нему: возвещаю днесь Господеви Богу твоему, яко внидох в землю, еюже клятся Господь отцем нашым дати нам:

⁴и да возмет жрец от руку твоею кошницу и да положит ю пред олтарем Господа Бога твоего:

⁵и отвещав речеши пред Господем Богом твоим: сирию остави отец мой и сниде во египте и обита тамо в числе малем, и бысть тамо в язык велик и во множество много и велико:

⁶и озлобиша нас египтяне, и смириша ны, и возложиша на ны дела жестокая:

⁷и возопихом ко Господу Богу отец наших, и услыша Господь вопль наш и виде смирение наше и труд наш и скорбь нашу,

⁸и изведе ны Господь из египта сам крепостию своею великою и рукою сильною и мышцею высокою, и в видениих великих и в знамениих и в чудесех,

⁹и введе ны в место сие, и даде нам землю сию, землю кипящую медом и млеком:

¹⁰и ныне се, принесох начатки от плодов земли, юже дал ми еси, Господи, землю кипящую медом и млеком. И оставиши е пред Господем Богом твоим, и поклонишися тамо пред Господем Богом твоим,

¹¹и возвеселишися о всех благих, яже даде тебе Господь Бог твой, и дом твой, и левит, и пришлец иже у тебе.

¹²Егда же совершиши одесятити всю десятину плодов земли твоея в лето третие, вторую десятину да даси левиту и пришелцу и сироте и вдове, и ядят во градех твоих и насытятся:

¹³и речеши пред Господем Богом твоим: очистих святая из дому моего, и дах я левиту и пришелцу и сироте и вдове, по всем заповедем твоим, яже заповедал еси мне: не преступих заповеди твоея и не забых,

¹⁴и не ядох в болезни моей от них, не принесох от них в нечистое, ниже дах от них умершему: послушах гласа Господа Бога моего, сотворих, якоже заповедал еси мне:

¹⁵призри с небесе от храма святаго твоего, и благослови люди твоя израиля и землю, юже дал еси им якоже клялся еси отцем нашым, дати нам землю кипящую медом и млеком.

¹⁶В сей день заповеда тебе Господь Бог твой сотворити вся оправдания сия и судбы: и сохраните и сотворите я от всего сердца вашего и от всея души вашея.

¹⁷Господа избрал еси днесь быти тебе в Бога, и ходити во всех путех его и хранити оправдания и заповеди и судбы его, и послушати гласа его.

¹⁸И Господь избра вас днесь, да будете ему люди избраннии, якоже рече тебе, хранити вся заповеди его,

¹⁹и быти тебе вышше всех язык, иже сотвори тя именита и хвальна и славна, быти вам людем святым Господу Богу вашему, якоже глагола.