Read Елизаветинская Библия, 1751 Второзаконие 27 Bible Online

Второзаконие 27 - Елизаветинская Библия, 1751 bible

Второзаконие 27

¹И заповеда моисей и старейшины сынов израилевых, глаголя: сохраните вся заповеди сия, елики аз заповедаю вам днесь.

²И будет в оньже день прейдете иордан на землю, юже Господь Бог твой дает тебе во жребий, и поставиши себе камение велико и обелиши я мелом,

³и напишеши на каменех тех вся словеса закона сего, егда прейдете иордан, егда внидете в землю, юже Господь Бог твой дает тебе, землю кипящую медом и млеком, якоже рече Господь Бог отец твоих тебе.

⁴И будет егда прейдете иордан, да поставите камение сие, яже аз повелеваю вам днесь, в горе гевал, и побелиши их мелом:

⁵и да созиждеши тамо олтарь Господеви Богу твоему, олтарь от камения: да не возложиши на них железа:

⁶камением всецелым да созиждеши олтарь Господеви Богу твоему и вознесеши на нем всесожжения Господеви Богу твоему,

⁷и пожреши жертву спасения: и яси, и насытишися тамо, и возвеселишися пред Господем Богом твоим,

⁸и напишеши на камениих сих весь закон сей яве зело.

⁹И глагола моисей и жерцы левити всему израилю, глаголюще: молчи и слыши, израилю, в день сей стался еси в люди Господеви Богу твоему:

¹⁰и да послушаеши гласа Господа Бога твоего, и да сотвориши вся заповеди его и оправдания его, яже аз заповедаю тебе днесь.

¹¹И заповеда моисей людем в той день, глаголя:

¹²сии да станут благословляти люди на горе гаризин, прешедше иордан: симеон, левий, иуда, иссахар, иосиф и вениамин:

¹³и сии да станут на клятву на горе гевал: рувим, гад и асир, завулон, дан и неффалим.

¹⁴И отвещавше рекут левити всему израилю гласом великим:

¹⁵проклят человек, иже сотворит изваяние и слияние, мерзость Господеви, дело рук художника, и положит е в сокровении. И отвещавше вси людие рекут: буди.

¹⁶Проклят безчестяй отца своего или матерь свою. И рекут вси людие: буди.

¹⁷Проклят прелагаяй пределы ближняго своего. И рекут вси людие буди.

¹⁸Проклят прельщаяй слепаго в пути. И рекут вси людие: буди.

¹⁹Проклят, иже уклонит суд пришелцу и сироте и вдове. И рекут вси людие: буди.

²⁰Проклят лежай с женою отца своего, яко открыл есть покровение отца своего. И рекут вси людие: буди.

²¹Проклят лежай со всяким скотом. И рекут вси людие: буди.

²²Проклят лежай с сестрою своею, дщерию отца своего или дщерию матере своея и рекут вси людие: буди.

²³Проклят лежай с тещею своею. И рекут вси людие: буди. Проклят лежай с сестрою жены своея. И рекут вси людие: буди.

²⁴Проклят бияй ближняго с лестию. И рекут вси людие: буди.

²⁵Проклят, иже возмет дары поразити душу крове неповинныя. И рекут вси людие: буди.

²⁶Проклят всяк человек, иже не пребудет во всех словесех закона сего, еже творити я. И рекут вси людие: буди.