Read Елизаветинская Библия, 1751 Второзаконие 28 Bible Online

Второзаконие 28 - Елизаветинская Библия, 1751 bible

Второзаконие 28

¹И будет егда прейдете иордан в землю, юже Господь Бог ваш дает вам, аще слухом послушаете гласа Господа Бога вашего хранити и творити вся заповеди его, яже аз заповедаю тебе днесь, и даст тя Господь Бог твой вышше всех язык земли:

²и приидут на тя вся благословения сия и обрящете тя. Аще слухом послушаеши гласа Господа Бога твоего,

³благословен ты во граде и благословен ты на селе,

⁴благословена исчадия чрева твоего и плоды земли твоея, и стада волов твоих и паствы овец твоих,

⁵благословены житницы твои и останцы твои,

⁶благословен ты внегда входити тебе и благословен ты внегда исходити тебе.

⁷Да предаст тебе Господь Бог враги твоя, сопротивящыяся тебе, сокрушены пред лицем твоим: путем единем изыдут на тя и седмию путьми побежат от лица твоего.

⁸Да послет Господь на тя благословение в хранилищах твоих и на вся, на няже возложиши руку твою на земли, юже Господь Бог твой дает тебе.

⁹Да возставит тя Господь Бог твой себе люд свят, якоже клятся отцем твоим. Аще послушаеши гласа Господа Бога твоего и ходити будеши в путех его,

¹⁰и узрят тя вси языцы земнии яко имя Господа (Бога твоего) призвася на тя, и убоятся тебе,

¹¹и умножит тя Господь Бог твой во благая во исчадиех утробы твоея и во исчадиех скотов твоих, и в плодех земли твоея, на земли твоей, юже клятся Господь отцем твоим дати тебе.

¹²Да отверзет тебе Господь сокровище свое благое, небо, иже дати дождь земли твоей во время свое, да благословит вся дела рук твоих: и даси взаим языком многим, ты же не одолжишися: и обладаеши ты многими языки, тобою же не возобладают.

¹³Да поставит тя Господь Бог твой во главу, а не в хвост: и будеши тогда выше, и не будеши ниже, аще послушаеши заповедий Господа Бога твоего, елика аз заповедаю тебе днесь хранити и творити:

¹⁴да не преступиши от всех словес, яже аз заповедаю тебе днесь, на десно ниже на лево, ходити вслед богов иных служити им.

¹⁵И будет аще не послушаеши гласа Господа Бога твоего хранити и творити вся заповеди его, елики аз заповедаю тебе днесь, и приидут на тя вся клятвы сия и постигнут тя:

¹⁶проклят ты во граде и проклят ты на селе,

¹⁷прокляты житницы твои и останки твои,

¹⁸проклята исчадия утробы твоея и плоды земли твоея, стада волов твоих и паствы овец твоих,

¹⁹проклят ты внегда входити тебе и проклят ты внегда исходити тебе.

²⁰Да послет тебе Господь скудость и глад и истребление на вся, на няже возложиши руку твою, елика аще сотвориши, дондеже потребит тя и дондеже погубит тя вскоре, злых ради начинаний твоих, зане оставил еси мя.

²¹Да прилепит Господь к тебе смерть, дондеже потребит тя от земли, в нюже ты входиши тамо наследити ю.

²²Да поразит тя Господь неимением и огневицею, и стужею и жжением, и убийством и ветром тлетворным и бледостию, и поженут тя, дондеже погубят тя.

²³И будет небо над главою твоею медяно и земля под тобою железна.

²⁴Да даст Господь дождь земли твоей прах, и персть с небесе снидет на тя, дондеже сокрушит тя и дондеже погубит тя.

²⁵Да даст тя Господь на изсечение пред враги твоими: путем единем изыдеши к ним и седмию пути побежиши от лица их, и будеши в разсеяние во всех царствах земных,

²⁶и будут мертвецы ваши снедь птицам небесным и зверем земным, и не будет отгоняяй.

²⁷Да поразит тя Господь вредом египетским в седалищах и крастою дивиею и свербом, яко не мощи тебе исцелитися.

²⁸Поразит тя Господь неистовством и слепотою и изступлением ума,

²⁹и будеши осязаяй в полудни, якоже осязает слепый во тме, и не исправит путий твоих: и будеши тогда обидим и расхищаемь во вся дни, и не будет помогаяй тебе.

³⁰Жену поймеши, и ин муж возимеет ю: дом созиждеши, и не поживеши в нем: виноград насадиши, и не обереши его:

³¹телец твой заклан пред тобою, и не снеси от него: осля твое отято от тебе, и не отдастся тебе: овцы твоя отданы (будут) врагом твоим, и не будет тебе помогаяй:

³²сынове твои и дщери твоя отданы (будут) языку иному, и очи твои узрят истаевающе на сия, и не возможет рука твоя:

³³плоды земли твоея и вся труды твоя пояст язык, егоже не веси, и будеши обидимь и сокрушаем во вся дни,

³⁴и будеши изумлен, видений ради очес твоих, яже узриши.

³⁵Да поразит тя Господь вредом злым на коленах и на голенех, яко не мощи исцелитися тебе от стоп ног твоих даже до верха (главы) твоея.

³⁶Да отведет тя Господь и князи твоя, яже поставиши себе, в язык, егоже не веси ты и отцы твои, и послужиши тамо богом иным, древу и камению,

³⁷и будеши тамо в гадание и в притчу и повесть во всех языцех, в няже введет тя Господь (Бог) тамо.

³⁸Семя много изнесеши на поле, и мало внесеши, яко поядят я прузи:

³⁹виноград насадиши и возделаеши, и вина не испиеши, ниже возвеселишися от него, яко пояст я червь:

⁴⁰маслины будут тебе во всех пределех твоих, и елеем не помажешися, яко истечет маслина твоя:

⁴¹сыны и дщери родиши, и не будут тебе, отидут бо в плен:

⁴²вся древесная твоя и вся жита земли твоея потребит ржа:

⁴³пришлец, иже есть у тебе, взыдет над тя выше выше, ты же низидеши низу низу:

⁴⁴сей взаим даст тебе, ты же ему взаим не даси: сей будет глава, ты же будеши хвост.

⁴⁵И приидут на тя вся клятвы сия, и поженут тя и постигнут тя, дондеже потребят тя и дондеже погубят тя: яко не послушал еси гласа Господа Бога твоего, еже хранити заповеди его и оправдания его, елика заповеда тебе.

⁴⁶И будут на тебе знамения и чудеса, и в семени твоем до века,

⁴⁷понеже не послужил еси Господеви Богу твоему с веселием и благим сердцем, множества ради всех (благих),

⁴⁸и послужиши врагом твоим, яже послет Господь Бог твой на тя с гладом и жаждею, и наготою и оскудеением всех: и возложит ярем железен на выю твою, дондеже сокрушит тя.

⁴⁹И наведет Господь на тя язык издалеча от края земли аки устремление орле, язык, егоже не уразумееши глагола,

⁵⁰язык безстуден лицем, иже не удивится лицу старчу и юна не помилует:

⁵¹и пояст плоды скотов твоих и плоды земли твоея, яко не оставит тебе пшеницы, ни вина, ни елеа, стад волов твоих и паств овец твоих, дондеже погубит тя:

⁵²и сокрушит тя во всех градех твоих, дондеже разорятся стены твоя высокия и крепкия, на нихже ты уповаеши, во всей земли твоей: и озлобит тя во всех градех твоих, яже даде тебе Господь Бог твой.

⁵³И снеси чада утробы твоея, плоть сынов и дщерей твоих, ихже даде тебе Господь Бог твой, в тесноте твоей и в скорби твоей, еюже оскорбит тя враг твой.

⁵⁴сный в вас и младый зело позавидит оком своим брату своему и жене яже на лоне его, и оставшымся чадом, яже аще останутся ему:

⁵⁵яко дати единому их от плотей чад своих, ихже ял еси, понеже ничто остася ему в тесноте и скорби твоей, еюже оскорбят тя врази твои во всех градех твоих.

⁵⁶И юная в вас (жена) и млада зело, еяже не обыче нога ея ходити по земли юности ради и младости, позавидит оком своим мужу своему иже на лоне ея, и сыну и дщери своей,

⁵⁷и блоне своей изшедшей из чресл ея, и чаду своему еже аще родит: снест бо я тайно, скудости ради всех в тесноте и скорби своей, еюже оскорбит тя враг твой во всех градех твоих.

⁵⁸Аще не послушаете творити вся словеса закона сего, написанная в книзе сей, еже боятися имене чуднаго и чуднаго сего, Господа Бога твоего,

⁵⁹и удивит Господь язвы твоя и язвы семене твоего, язвы великия и дивныя, и болезни злыя и известныя,

⁶⁰и обратит на тя всю болезнь египетскую злую, еяже ты боялся еси от лица их, и прилепятся к тебе:

⁶¹и все разслабление, и всю язву ненаписанную и всю писаную в книзе закона сего наведет Господь на тя, дондеже потребит тя:

⁶²и останетеся в числе малем, вместо того егда бысте яко звезды небесныя множеством, яко не послушасте гласа Господа Бога вашего.

⁶³И будет, якоже возвеселися Господь о вас благотворити вам и умножити вас, тако возвеселится Господь о вас потребити вас: и возметеся от земли, в нюже вы входите тамо наследити ю,

⁶⁴и разсеет тя Господь Бог твой во вся языки, от края земли даже до края ея, и послужиши тамо богом иным, древу и камению, ихже не знал еси ты и отцы твои:

⁶⁵но и во языцех онех не упокоит тя, ниже будет стояния стопе ноги твоея: и даст тебе Господь тамо сердце печальное и оскудевающая очеса и истаявающую душу:

⁶⁶и будет живот твой висящь пред очима твоима, и убоишися во дни и в нощи, и не будеши веры яти житию твоему:

⁶⁷Заутра речеши: како будет вечер? и в вечер речеши: како будет утро? от страха сердца твоего, имже убоишися, и от видении очес твоих, имиже узриши:

⁶⁸и возвратит тя Господь Бог во египет в кораблех, и на пути егоже рекох, не приложите ксему видети его: и продани будете тамо врагом вашым в рабы и в рабыни, и не будет купующаго.