Read Елизаветинская Библия, 1751 Второзаконие 29 Bible Online

Второзаконие 29 - Елизаветинская Библия, 1751 bible

Второзаконие 29

¹Сия словеса завета, яже завеща Господь моисею уставити сыном израилевым в земли моавли, кроме завета, егоже завеща им в хориве.

²И призва моисей вся сыны израилевы и рече к ним: вы видесте вся, елика сотвори Господь в земли египетстей пред вами фараону и всем слугам его и всей земли его,

³искушения великая, яже видеста очи твои, знамения и чудеса великая оная, руку крепкую и мышцу высокую:

⁴и не даде Господь Бог вам сердца разумети и очес видети и ушес слышати, даже до дне сего:

⁵и водил вас четыредесять лет по пустыни: не обетшаша ризы вашя, и сапози ваши не сотрошася на ногах ваших:

⁶хлеба не ядосте, вина и сикера не писте, да познаете, яко сей Господь Бог ваш:

⁷и приидосте до сего места: и изыде сион царь есевонский и ог царь васанский во сретение нам на брань,

⁸и поразихом их на брани, и прияхом землю их: и дах ю во жребий рувиму и гаду и полуплемени манассиину.

⁹И сохраните творити вся словеса завета сего творити я, да разумеете вся, елика сотворите.

¹⁰Вы стасте вси днесь пред Господем Богом вашим, племеноначалницы ваши и старейшины ваши, и судии ваши и писмовводители ваши, всяк муж израилтеск,

¹¹и жены вашя и чада ваша, пришлец иже посреде полка вашего, от древосечца вашего даже до водоносца вашего,

¹²еже прейти в завет Господа Бога вашего и в клятвы его, елика завещает Господь Бог твой к тебе днесь:

¹³да поставит тя себе в люди, и той будет тебе Бог, якоже тебе рече и якоже клятся отцем твоим, аврааму и исааку и иакову.

¹⁴И не вам единем аз завет сей и клятву сию завещаваю,

¹⁵но и зде сущым с вами днесь, пред Господем Богом вашим, и не сущым с вами зде днесь.

¹⁶Яко вы весте, како жихом в земли египетстей и како проидохом посреде языков, ихже преидосте,

¹⁷и видесте мерзости их и кумиры их, древо и камение, сребро и злато, яже суть у них.

¹⁸Еда кто есть в вас муж или жена, или отечество или племя, егоже сердце уклонися от Господа Бога вашего, ити еже служити богом языков оных? еда кий есть в вас корень горе прорастающь в желчи и горести?

¹⁹И будет аще услышит словеса клятвы сея и похвалится в сердцы своем, глаголя: преподобно мне да будет, яко в прельщении сердца моего пойду, да не погубит грешник безгрешнаго (с собою):

²⁰не восхощет Бог милостив быти ему, но тогда разгорится гнев Господень и ревность его на человека того: и прилепятся ему вся клятвы завета сего, писанныя в книзе закона сего: и потребит Господь имя его от поднебесныя,

²¹и отлучит его Господь на злая от всех сынов израилевых, по всем клятвам завета написаннаго в книзе закона сего.

²²И речет род ин, сынове ваши, иже востанут по вас, и чуждый иже приидет от земли далекия, и узрят язвы земли оныя и недуги ея, яже посла Господь на ню,

²³жупел и соль сожженную: вся земля ея не насеется, ни прозябнет, ниже возникнет на ней всяк злак: якоже опровержеся содом и гоморр, адама и севоим, яже опроверже Господь в ярости и гневе своем.

²⁴И рекут вси языцы: почто сотвори Господь сице земли сей? кая ярость гнева великая сия?

²⁵И рекут: яко оставиша завет Господа Бога отец своих, егоже завеща отцем их, егда изведе их от земли египетския,

²⁶и шедше послужиша богом иным, и поклонишася им, ихже не ведяху, и не даде им ничтоже ни един:

²⁷и разгневася яростию Господь на землю ту, еже навести на ню по всем клятвам завета, писанным в книгах закона сего:

²⁸и изят их Господь от земли их яростию и гневом, и прогневанием великим зело, и изверже их в землю ину якоже ныне.

²⁹Тайная Господеви Богу нашему, нам же явленная и чадом нашым во веки, творити вся словеса закона сего.