Read Елизаветинская Библия, 1751 Второзаконие 30 Bible Online

Второзаконие 30 - Елизаветинская Библия, 1751 bible

Второзаконие 30

¹И будет егда приидут на тя вся словеса сия, благословение и клятва, юже дах пред лицем твоим, и приимеши в сердце твое во всех языцех, в няже расточит тя Господь Бог твой тамо,

²и обратишися ко Господу Богу твоему, и послушаеши гласа его по всем, елика аз заповедаю тебе днесь, ты и сын твой, от всего сердца твоего и от всея души твоея,

³и исцелит Господь грехи твоя и помилует тя, и паки соберет тя от всех языков, в няже разсыпа тя Господь Бог тамо.

⁴Аще будет разсеяние твое от края небесе даже до края небесе, оттуду соберет тя Господь Бог твой и оттуду возмет тя,

⁵и введет тя Господь Бог твой оттуду в землю, юже наследиша отцы твои, и наследиши ю: и благо тебе сотворит, и умножит тя паче отец твоих

⁶и очистит Господь сердце твое и сердце семене твоего, любити Господа Бога твоего от всего сердца твоего и от всея души твоея, да живеши ты:

⁷и даст Господь Бог твой клятвы сия на враги твоя и на ненавидящыя тя, иже изгнаша тя:

⁸и ты обратишися и послушаеши гласа Господа Бога твоего и сотвориши заповеди его, елики аз заповедаю тебе днесь.

⁹И благословит тя Господь Бог твой во всяком деле руку твоею, в плодех утробы твоея и в плодех скотов твоих и в житех земли твоея, яко обратится Господь Бог твой возвеселитися о тебе во благих, якоже возвеселися от отцех твоих:

¹⁰аще послушаеши гласа Господа Бога твоего хранити и творити вся заповеди его и оправдания его и суды его, написанныя в книзе закона сего: аще обратишися ко Господу Богу твоему от всего сердца твоего и от всея души твоея.

¹¹Яко заповедь сия, юже аз заповедаю тебе днесь, не тяжка есть, ниже далече есть от тебе:

¹²не на небеси есть, глаголя: кто взыдет от нас на небо и возмет ю нам, и услышавше ю сотборим?

¹³ниже об ону страну моря есть, глаголяй: кто прейдет нам на юну страну моря и возмет ю нам, и услышавше ю сотворим?

¹⁴близ тебе есть глагол зело, во устех твоих и в сердцы твоем и в руку твоею, творити его.

¹⁵Се, дах пред лицем твоим днесь жизнь и смерть, благо и зло.

¹⁶Аще послушаеши заповедий Господа Бога твоего, яже аз заповедаю тебе днесь, любити Господа Бога твоего, ходити во всех путех его и хранити оправдания его и заповеди его и суды его, и поживеши, и умножишися, и благословит тя Господь Бог твой на всей земли, в нюже входиши наследити ю тамо.

¹⁷И аще превратится сердце твое, и не послушаеши, и заблудив поклонишися богом иным и послужиши им,

¹⁸возвещаю вам днесь, яко погибелию погибнете, и не многодневни будете на земли, юже Господь Бог дает тебе, в нюже вы преходите иордан тамо наследити ю.

¹⁹Засвидетелствую вам днесь небом и землею: живот и смерть дах пред лицем вашим, благословение и клятву: и избери живот, да живеши ты и семя твое,

²⁰любити Господа Бога твоего, послушати гласа его и прилепитися к нему: яко сие живот твой, и долгота дний твоих, жити на земли, еюже клятся Господь Бог отцем твоим, аврааму и исааку и иакову, дати им.