Read Елизаветинская Библия, 1751 Второзаконие 34 Bible Online

Второзаконие 34 - Елизаветинская Библия, 1751 bible

Второзаконие 34

¹И взыде моисей от аравофа моавля на гору навав, на верх фазга, яже есть прямо иерихону: и показа ему Господь всю землю галаадску даже до дана,

²и всю землю неффалимлю, и всю землю ефремову и манассиину, и всю землю иудину даже до моря последняго,

³и пустыню и окрестная (села) иерихона, град фиников даже до сигора,

⁴и рече Господь к моисею: сия земля, еюже кляхся аврааму и исааку и иакову, глаголя: семени вашему дам ю: и показах ю очесем твоим, и тамо не внидеши.

⁵И скончася тамо моисей раб Господень в земли моавли словом Господним.

⁶И погребоша его в земли моавли близ дому фогорова. И не уведа никтоже погребения его даже до дне сего.

⁷Моисею же бе сто и двадесять лет, егда скончася: не отемнесте очи его, ни истлеста устне его.

⁸И плакашася сынове израилевы моисеа во аравофе моавли у иордана близ иерихона тридесять дний. И скончашася дние плача сетования о моисей.

⁹И иисус сын навин наполнися духа разума: возложи бо моисей руце свои на него. И послушаша его сынове израилевы, и сотвориша якоже заповеда Господь моисею.

¹⁰И не воста ктому пророк во израили якоже моисей, егоже позна Господь лицем к лицу,

¹¹во всех знамениих и чудесех, егоже посла Господь сотворити я в земли египетстей фараону и рабом его и всей земли его,

¹²дивная великая, и руку крепкую (и мышцу высокую), яже сотвори моисей пред всем израилем.