Read Елизаветинская Библия, 1751 Второзаконие 4 Bible Online

Второзаконие 4 - Елизаветинская Библия, 1751 bible

Второзаконие 4

¹И ныне, израилю, послушай оправданий и судов, елика аз учу вас днесь делати, да поживете и умножитеся, и вшедше наследите землю, юже Господь Бог отец ваших дает вам в наследие:

²да не приложите к словеси, еже аз заповедаю вам, ниже да отимете от него: сохраните заповеди Господа Бога нашего, елика аз заповедаю вам днесь.

³Очи ваши видеша вся, елика сотвори Господь Бог наш веельфегору: яко всяк человек иже иде вслед веельфегора, потреби его Господь Бог наш от вас:

⁴вы же, прилежащии Господеви Богу вашему, живете вси до днесь:

⁵видите, показах вам оправдания и суды, якоже заповеда мне Господь Бог мой сотворити сице на земли, в нюже вы идете тамо, наследити ю:

⁶и сохраните, и сотворите, яко сия премудрость ваша и смышление пред всеми языки, елицы аще услышат вся оправдания сия и рекут: се, людие премудрии и уметелны: язык великий сей.

⁷Кий бо язык тако велий, емуже есть бог, приближаяйся ему, яко Господь Бог наш во всех, в нихже аще призовем его?

⁸и кий язык велик, емуже суть оправдания и суды правы по всему закону сему, егоже аз даю пред вами днесь?

⁹Вонми себе и снабди душу твою зело, и не забуди всех словес, яже видеста очи твои, и да не отступят от сердца твоего вся дни живота твоего: и да наставиши сыны твоя и сыны сынов твоих,

¹⁰в день в оньже стоясте пред Господем Богом вашим в хориве в день собрания, егда рече Господь ко мне: собери ко мне люди, и да слышат словеса моя, да научатся боятися мене вся дни, в няже сии живут на земли, и сыны своя да научат.

¹¹И приидосте, и стасте под горою: и гора горяше огнем даже до небесе, тма, мрак, и вихр.

¹²И глагола Господь к вам на горе из среды огня: глас словес его вы слышасте, и образа не видесте, токмо глас:

¹³и возвести вам завет свой, егоже заповеда вам творити, десять словес, и написа я на двоих скрижалех каменных:

¹⁴и мне заповеда Господь во время оно, научити вас оправданием и судам, творити вам я на земли, в нюже вы входите тамо наследити ю.

¹⁵И снабдите душы своя зело, яко не видесте всякаго подобия в день, в оньже глагола Господь к вам в горе хориве из среды огня:

¹⁶не беззаконнуйте, и не сотворите себе самим подобия ваянна, всякаго образа подобия мужеска пола или женска:

¹⁷и подобия всякаго скота, иже есть на земли, подобия всякия птицы пернатыя, под небесем парящия:

¹⁸подобия всякаго гада, иже плежет по земли: подобия всякия рыбы, елики суть в водах под землею:

¹⁹да не когда воззрев на небо и видев солнце и луну и звезды, и всю красоту небесную, прельстився поклонишися им и послужиши им, яже раздели Господь Бог твой всем языком, иже под небесем.

²⁰Вас же взя Господь Бог и изведе вас от пещи железны из египта, да будете ему людие в жребий, якоже в днешний день.

²¹И Господь Бог разгневася на мя о словесех ваших, и клятся, да не прейду иордана сего и да не вниду в землю, юже Господь Бог твой дает тебе в наследие:

²²аз бо умру в сей земли, и не прейду иордана сего, вы же прейдете и наследите землю благую сию.

²³Вонмите вы, да не когда забудете завета Господа Бога вашего, егоже завеща к вам, и да не сотворите сами себе изваянна подобия всех, яже заповеда тебе Господь Бог твой,

²⁴яко Господь Бог твой огнь потребляяй есть, Бог ревнитель.

²⁵Аще же родиши сыны и сыны сынов твоих, и умедлите на земли, и возбеззаконнуете, и сотворите изваянно подобие всякаго, и сотворите злое пред Господем Богом, вашим, еже раздражити его,

²⁶засвидетелствую вам днесь небесем и землею, яко пагубою погибнете от земли, на нюже вы преходите чрез иордан тамо наследити ю: не пребудете много дний на ней, но потреблением потребитеся:

²⁷и разсыплет вы Господь во всех языцех, и останетеся мали числом во языцех, в няже введет вы Господь тамо,

²⁸и послужите тамо богом иным, делом рук человеческих, древу и камению, иже не узрят и не услышат, ни ядят, ни обоняют:

²⁹и взыщете тамо Господа Бога вашего, и обрящете его, егда взыщете его от всего вашего сердца и от всея души вашея в скорби вашей.

³⁰И постигнут тя вся сия словеса в последняя дни, и обратишися к Господеви Богу твоему, и услышиши глас его,

³¹яко Бог щедр и милосерд Господь Бог твой, не оставит тебе, ниже потребит тебе, не забудет завета отец твоих, имже клятся им.

³²Вопросите дний первых, бывших прежде вас, от дне в оньже сотвори Бог человека на земли, и от края небесе даже до края небесе, аще бысть по словеси великому сему, аще слышано бысть сицево:

³³аще (кий) язык слыша глас Бога живаго глаголюща от среды огня, имже образом слышал еси ты, и жив был еси:

³⁴аще искуси Бог вшед взяти себе язык от среды языка искушением, и знамении и чудесы, и бранию и рукою сильною, и мышцею высокою и видении великими, по всему елико сотвори Господь Бог наш во египте пред тобою зрящим,

³⁵яко да разумееши ты, яко Господь Бог твой сей Бог есть, и несть разве его.

³⁶От небесе слышан сотвори тебе глас свой, еже научити тя, и на земли показа тебе огнь свой великий, и глаголы его слышал еси из среды огня:

³⁷занеже возлюби отцы твоя, избра семя их по них вас, и изведе тя сам силою своею великою из египта

³⁸потребити языки великия и крепчайшыя тебе пред лицем твоим, ввести тя, дати тебе землю их в наследие, якоже имаши днесь.

³⁹И увеси днесь, и обратишися умом, яко Господь Бог твой сей Бог на небеси горе и на земли долу, и несть разве его,

⁴⁰и да сохраниши заповеди его и оправдания его, елика аз заповедаю тебе днесь, да благо тебе будет и сыном твоим по тебе, яко да будете долголетни на земли, юже Господь Бог твой дает тебе вся дни.

⁴¹Тогда отдели моисей три грады об ону страну иордана на восток солнца,

⁴²еже убегати тамо убийце, иже аще убиет ближняго не ведый, и сей не ненавидя его прежде вчера и третияго дне, и да вбегнет во един град от сих и жив будет:

⁴³восор в пустыни в земли селней рувиму, и раммоф в галааде гадду, и гавлон в васане манассии.

⁴⁴Сей закон, егоже предложи моисей пред сыны израилтескими:

⁴⁵сия свидения и оправдания и суды, елика глагола моисей сыном израилевым в пустыни, изшедшым им из земли египетския,

⁴⁶об он пол иордана, в дебри, близ дому фогорова, в земли сиона царя аморрейска, иже живяше во есевоне, егоже изби моисей и сынове израилевы, изшедшым им из земли египетския.

⁴⁷И наследиша землю его и землю ога царя васанска, дву царей аморрейских, иже бяху об он пол иордана на восток солнца,

⁴⁸от ароира, иже есть во устии водотечи арнони и у горы сиона, яже есть аермон,

⁴⁹всю араву об ону страну иордана, на восток солнца под асидофом тесаным.