Read Елизаветинская Библия, 1751 Второзаконие 7 Bible Online

Второзаконие 7 - Елизаветинская Библия, 1751 bible

Второзаконие 7

¹И будет егда введет тя Господь Бог твой в землю, в нюже входиши тамо наследити ю, и изженет языки великия и многия от лица твоего, хеттеа и гергесеа, и аморреа и хананеа, и ферезеа и евеа и иевусеа, седмь языков великих и многих, и крепчае вас:

²и предаст их Господь Бог твой в руце твои, и избиеши я, пагубою погубиши я, да не завещаеши к ним завета, ниже да помилуеши их,

³ниже сватовства сотвориши с ними: дщери своея не даси сыну его, и дщере его да не поймеши сыну твоему:

⁴отвратит бо сына твоего от мене, и послужит богом инем: и разгневается Господь гневом на вы, и потребит тя вскоре.

⁵Но сице да сотворите им: требища их разсыплете, и столпы их да сокрушите, и дубравы их да посечете, и ваяния богов их да сожжете огнем:

⁶яко люди святи есте Господеви Богу вашему: и вас избра Господь Бог ваш, да будете ему люди избранни паче всех языков, елицы на лицы земли.

⁷Не яко мнози есте паче всех язык, предприя вас Господь и избра вас Господь, вы бо есте меншии от всех языков:

⁸но яко возлюби Господь вас, и храня клятву, еюже клятся отцем вашым, изведе Господь вас рукою крепкою и мышцею высокою, и избави тя от дому работы, от руки фараона царя египетска,

⁹и да увеси, яко Господь Бог твой сей Бог: Бог верный, храняй завет свой и милость любящым его и хранящым заповеди его в тысящы родов:

¹⁰и воздаяй ненавидящым его в лице потребити я, и не умедлит ненавидящым, в лице воздаст им.

¹¹И да сохраниши заповеди и оправдания и суды сия, елика аз заповедаю тебе творити днесь.

¹²И будет егда послушаете вся оправдания сия, и сохраните и сотворите я, сохранит и Господь Бог твой тебе завет и милость, якоже клятся отцем вашым,

¹³и возлюбит тя, и благословит тя и умножит тя, и благословит плод чрева твоего и плод земли твоея, пшеницу твою и вино твое и елей твой, и стада волов твоих и паствы овец твоих на земли, юже клятся Господь отцем твоим дати тебе:

¹⁴и благословен будеши паче всех язык и не будет в вас безчадный, ниже неплоды, и в скотех твоих:

¹⁵и отимет Господь Бог твой от тебе всяко разслабление и всяку язю египетскую злую, яже видел еси и елика веси: не возложит на тя, но возложит я на вся ненавидящыя тебе:

¹⁶и ясти будеши вся корысти языков, яже Господь Бог твой дает тебе: да не пощадит их око твое, и да не послужиши богом их, яко претыкание тебе есть сие.

¹⁷Аще же речеши во уме твоем: яко язык сей множае паче мене, како возмогу аз потребити я?

¹⁸не убоишися их: памятию да помянеши, елика сотвори Господь Бог твой фараону и всем египтяном,

¹⁹искушения великая, яже видеста очи твои, знамения она и чудеса великая, руку крепкую и мышцу высокую, якоже изведе тя Господь Бог твой: тако сотворит Господь Бог ваш всем языком, ихже ты боишися от лица их:

²⁰и шершни послет Господь Бог твой на них, дондеже потребятся оставшиися и сокрывшиися от тебе:

²¹не повредишися от лица их: яко Господь Бог твой в тебе, Бог великий и крепкий:

²²и погубит Господь Бог твой языки сия от лица твоего, помалу малу: не возможеши погубити их вскоре, да не будет земля пуста, и умножатся зверие дивии на тя:

²³и предаст их Господь Бог твой в руце твои, и погубиши их погублением великим, дондеже искорените их:

²⁴и предаст цари их в руце твои, и погубите имя их от места онаго: ниже един постоит пред лицем твоим, дондеже погубиши их.

²⁵Ваяния богов их да сожжете огнем, да не похощеши злата и сребра взяти себе от них, да не когда согрешиши того ради, яко мерзость есть Господеви Богу твоему:

²⁶и да не внесеши мерзости в свой дом, и проклят будеши якоже сия: ненавидением да возненавидиши, и омерзением да омерзиши, яко проклятме есть.