Read Елизаветинская Библия, 1751 От Иоанна 1 Bible Online

От Иоанна 1 - Елизаветинская Библия, 1751 bible

От Иоанна 1

¹В начале бе слово, и слово бе к Богу, и Бог бе слово.

²Сей бе искони к Богу:

³вся тем быша, и без него ничтоже бысть, еже бысть.

⁴В том живот бе, и живот бе свет человеком:

⁵и свет во тме светится, и тма его не объят.

⁶Бысть человек послан от Бога, имя ему иоанн:

⁷сей прииде во свидетелство, да свидетелствует о свете, да вси веру имут ему.

⁸Не бе той свет, но да свидетелствует о свете:

⁹бе свет истинный, иже просвещает всякаго человека грядущаго в мир:

¹⁰в мире бе, и мир тем бысть, и мир его не позна:

¹¹во своя прииде, и свои его не прияша.

¹²Елицы же прияша его, даде им область чадом Божиим быти, верующым во имя его,

¹³иже не от крове, ни от похоти плотския, ни от похоти мужеския, но от Бога родишася.

¹⁴И слово Плоть бысть и вселися в ны, и видехом славу его, славу яко единороднаго от Отца, исполнь благодати и истины.

¹⁵Иоанн свидетелствует о нем и воззва глаголя: сей бе, егоже рех, иже по мне грядый, предо мною бысть, яко первее мене бе.

¹⁶И от исполнения его мы вси прияхом и благодать воз благодать:

¹⁷яко закон моисеом дан бысть, благодать (же) и истина Иисус Христом бысть.

¹⁸Бога никтоже виде нигдеже: единородный Сын, сый в лоне Отчи, той исповеда.

¹⁹И сие есть свидетелство иоанново, егда послаша жидове от Иерусалима иереев и левитов, да вопросят его: ты кто еси?

²⁰И исповеда и не отвержеся: и исповеда, яко несмь аз Христос.

²¹И вопросиша его: что убо? илиа ли еси ты? И глагола: несмь. Пророк ли еси? И отвеща: ни.

²²Реша же ему: кто еси? да ответ дамы пославшым ны: что глаголеши о тебе самем?

²³Рече: аз глас вопиющаго в пустыни: исправите путь Господень, якоже рече исаиа пророк.

²⁴И посланнии беху от фарисей:

²⁵и вопросиша его и реша ему: что убо крещаеши, аще ты неси Христос, ни илиа, ни пророк?

²⁶Отвеща им иоанн, глагола: аз крещаю водою: посреде же вас стоит, егоже вы не весте:

²⁷той есть грядый по мне, иже предо мною бысть, емуже несмь аз достоин, да отрешу ремень сапогу его.

²⁸Сия в вифаваре быша об он пол иордана, идеже бе иоанн крестя.

²⁹Во утрий (же) виде иоанн Иисуса грядуща к себе и глагола: се, агнец Божий, вземляй грехи мира:

³⁰сей есть, о немже аз рех: по мне грядет муж, иже предо мною бысть, яко первее мене бе:

³¹и аз не ведех его: но да явится израилеви, сего ради приидох аз водою крестя.

³²И свидетелствова иоанн, глаголя, яко видех Духа сходяща яко голубя с небесе, и пребысть на нем:

³³и аз не ведех его: но пославый мя крестити водою, той мне рече: над негоже узриши Духа сходяща и пребывающа на нем, той есть крестяй Духом святым:

³⁴и аз видех и свидетелствовах, яко сей есть Сын Божий.

³⁵Во утрий (же) паки стояше иоанн, и от ученик его два.

³⁶И узрев Иисуса грядуща, глагола: се, агнец Божий.

³⁷И слышаста его оба ученика глаголющаго, и по Иисусе идоста.

³⁸Обращься же Иисус и видев я по себе идуща, глагола има: чесо ищета? Она же реста ему: равви, еже глаголется сказаемо учителю, где живеши?

³⁹(И) глагола има: приидита и видита. Приидоста и видеста, где живяше, и у него пребыста день той. Бе же час яко десятый.

⁴⁰Бе (же) андрей, брат симона петра, един от обою слышавшею от иоанна и по нем шедшею.

⁴¹Обрете сей прежде брата своего симона и глагола ему: обретохом мессию, еже есть сказаемо Христос.

⁴²И приведе его ко Иисусови. Воззрев же нань Иисус рече: ты еси симон сын ионин: ты наречешися кифа, еже сказается петр.

⁴³Во утрий (же) восхоте изыти в галилею: и обрете филиппа и глагола ему: гряди по мне.

⁴⁴Бе (же) филипп от вифсаиды, от града андреова и петрова.

⁴⁵Обрете филипп нафанаила и глагола ему: егоже писа моисей в законе и пророцы, обретохом Иисуса Сына иосифова, иже от назарета.

⁴⁶И глагола ему нафанаил: от назарета может ли что добро быти? Глагола ему филипп: прииди и виждь.

⁴⁷Виде (же) Иисус нафанаила грядуща к себе и глагола о нем: се, воистинну израилтянин, в немже льсти несть.

⁴⁸Глагола ему нафанаил: како мя знаеши? Отвеща Иисус и рече ему: прежде даже не возгласи тебе филипп, суща под смоковницею видех тя.

⁴⁹Отвеща нафанаил и глагола ему: равви, ты еси Сын Божий, ты еси Царь израилев.

⁵⁰Отвеща Иисус и рече ему: зане рех ти, яко видех тя под смоковницею, веруеши: болша сих узриши.

⁵¹И глагола ему: аминь, аминь глаголю вам, отселе узрите небо отверсто и ангелы Божия восходящыя и нисходящыя над сына Человеческаго.