Read Елизаветинская Библия, 1751 Деяния 14 Bible Online

Деяния 14 - Елизаветинская Библия, 1751 bible

Деяния 14

¹Бысть же во иконии, вкупе внити има в сонмище иудейское и глаголати тако, яко веровати иудеев и еллинов множеству многу.

²Неверующии же иудее воздвигоша и озлобиша душы языков на братию.

³Доволно же убо время пребыста дерзающа о Господе, свидетелствующем слову благодати своея и дающем знамения и чудеса быти рукама их.

⁴Разделишажеся множество града, и ови убо бяху со иудеи, ови же со апостолы.

⁵И егда бысть стремление языком же и иудеем с началники их досадити и камением побити их,

⁶уведевша же прибегоста во грады ликаонския, в листру и дервию, и во окрестныя их,

⁷и тамо беста благовествующа.

⁸И некто муж в листрех немощен ногама седяше, хром от чрева матере своея сый, иже николиже бе ходил.

⁹Сей слышаше павла глаголюща: иже воззрев нань и видев, яко веру имать здрав быти,

¹⁰рече велиим гласом: тебе глаголю во имя Господа Иисуса Христа, встани на ногу твоею прав. И абие возскочи и хождаше.

¹¹Народи же видевше, еже сотвори павел, воздвигоша глас свой, ликаонски глаголюще: бози уподобльшеся человеком снидоша к нам.

¹²Нарицаху же убо варнаву диа, павла же ермиа, понеже той бяше началник слова.

¹³Жрец же диев, сущаго пред градом их, приведе юнцы и (принесе) венцы пред врата, с народы хотяше жрети.

¹⁴Слышавша же апостола варнава и павел, растерзавша ризы своя, вскочиста в народ, зовуща и глаголюща:

¹⁵мужие, что сия творите? и мы подобострастна есма вам человека, благовествующа вам от сих суетных обращатися к Богу живу, иже сотвори небо и землю и море и вся, яже в них:

¹⁶иже в мимошедшыя роды оставил бе вся языки ходити в путех их:

¹⁷и убо не несвидетелствована себе остави, благотворя, с небесе нам дожди дая и времена плодоносна, исполняя пищею и веселием сердца наша.

¹⁸И сия глаголюща, едва устависта народы не жрети има, но отити коемуждо во своя си. Пребывающема же има и учащема,

¹⁹приидоша от антиохии и иконии нецыи иудее, и стязающемася има с дерзновением, наустиша народы отступити от нею, глаголюще, яко ничтоже истинно глаголета, но все лжета. И наустивше народы и камением побивше павла, извлекоша вне града, мняще его умерша.

²⁰Окрест же ставшым его учеником, востав вниде во град и наутрие изыде с варнавою в дервию.

²¹Благовествовавша же граду тому и научивша многи, возвратистася в листру и иконию и антиохию,

²²утверждающа душы учеников, моляща пребыти в вере, и яко многими скорбьми подобает нам внити в Царствие Божие.

²³Рукоположша же им пресвитеры на вся Церкви и помолившася с постом, предаста их Господеви, в негоже увероваша.

²⁴И прошедша писидию, приидоста в памфилию:

²⁵и глаголавша в пергии слово Господне, снидоста во атталию

²⁶и оттуду отплыста во антиохию, отнюдуже беста предана благодати Божией в дело, еже скончаста.

²⁷Пришедша же и собравша Церковь, сказаста, елика сотвори Бог с нима и яко отверзе языком дверь веры:

²⁸пребыста же тамо время не мало со ученики.