Read Елизаветинская Библия, 1751 К Римлянам 14 Bible Online

К Римлянам 14 - Елизаветинская Библия, 1751 bible

К Римлянам 14

¹Изнемогающаго же в вере приемлите, не в сомнение помышлении.

²Ов бо верует ясти вся, а изнемогаяй зелия да яст.

³Ядый не ядущаго да не укаряет: и не ядый ядущаго да не осуждает: Бог бо его прият.

⁴Ты кто еси судяй чуждему рабу? Своему Господеви стоит, или падает. Станет же, силен бо есть Бог поставити его.

⁵Ов убо разсуждает день чрез день, ов же судит на всяк день. Кииждо своею мыслию да извествуется.

⁶Мудрствуяи день, Господеви мудрствует: и не мудрствуяй день, Господеви не мудрствует. Ядый, Господеви яст. благодарит бо Бога: и не ядый, Господеви не яст, и благодарит Бога.

⁷Никтоже бо нас себе живет, и никтоже себе умирает:

⁸аще бо живем, Господеви живем, аще же умираем, Господеви умираем: аще убо живем, аще умираем, Господни есмы.

⁹На сие бо Христос и умре и воскресе и оживе, да и мертвыми и живыми обладает.

¹⁰Ты же почто осуждаеши брата твоего, или ты что уничижаеши брата твоего? Вси бо предстанем судищу Христову.

¹¹Писано бо есть: живу аз, глаголет Господь, яко мне поклонится всяко колено, и всяк язык исповестся Богови.

¹²Темже убо кийждо нас о себе слово даст Богу.

¹³Не ктому убо друг друга осуждаем, но сие паче судите, еже не полагати претыкания брату или соблазна.

¹⁴Вем и извещен есмь о Христе Иисусе, яко ничтоже скверно само собою: точию помышляющему что скверно быти, оному скверно есть.

¹⁵Аще же брашна ради брат твой скорбит, уже не по любви ходиши: не брашном твоим того погубляй, за негоже Христос умре.

¹⁶Да не хулится убо ваше благое.

¹⁷Несть бо Царство Божие брашно и питие, но правда и мир и радость о Дусе святе.

¹⁸Иже бо сими служит Христови, благоугоден есть Богови и искусен человеком.

¹⁹Темже убо мир возлюбим и яже к созиданию друг ко другу.

²⁰Не брашна ради разоряй дело Божие. Вся бо чиста, но зло человеку претыканием ядущему.

²¹Добро не ясти мяс, ниже пити вина, ни о немже брат твой претыкается или соблазняется или изнемогает.

²²Ты веру имаши? о себе сам имей пред Богом. Блажен не осуждаяй себе, о немже искушается.

²³А сомняяйся, аще яст, осуждается, зане не от веры: всяко же, еже не от веры, грех есть.

²⁴Могущему же вас утвердити по благовествованию моему и проповеданию Иисус Христову, по откровению тайны, леты вечными умолчанныя,

²⁵явльшияся же ныне, писании пророческими, по повелению вечнаго Бога, в послушание веры во всех языцех познавшияся,

²⁶единому премудрому Богу, Иисусом Христом, емуже слава во веки. Аминь.