Read Елизаветинская Библия, 1751 К Римлянам 16 Bible Online

К Римлянам 16 - Елизаветинская Библия, 1751 bible

К Римлянам 16

¹Вручаю же вам фиву сестру нашу, сущу служительницу Церкве яже в кегхреех:

²да приимете ю о Господе достойне святым, и споспешствуите ей, о нейже аще от вас потребует вещи: ибо сия заступница многим бысть, и самому мне.

³Целуйте прискиллу и акилу, споспешника моя о Христе Иисусе,

⁴иже по души моей своя выя положиста, ихже не аз един благодарю, но и вся Церкви языческия: и домашнюю их Церковь.

⁵Целуйте епенета возлюбленнаго ми, иже есть начаток ахаии во Христа.

⁶Целуйте мариамь, яже много трудися о нас.

⁷Целуйте андроника и иунию, сродники моя и спленники моя, иже суть нарочиты во апостолех, иже и прежде мене вероваста во Христа.

⁸Целуйте амплиа возлюбленнаго ми о Господе.

⁹Целуйте урвана споспешника нашего о Христе, и стахиа возлюбленнаго ми.

¹⁰Целуйте апеллиа искусна о Христе. Целуйте сущыя от аристовула.

¹¹Целуйте иродиона сродника моего. Целуйте иже от наркисса сущыя о Господе.

¹²Целуйте трифену и трифосу труждающыяся о Господе. Целуйте персиду возлюбленную, яже много трудися о Господе.

¹³Целуйте руфа избраннаго о Господе, и матерь его и мою.

¹⁴Целуйте асигкрита, флегонта, ерма, патрова, ермиа, и сущую с ними братию.

¹⁵Целуйте филолога и иулию, ниреа и сестру его, и олимпана, и сущыя с ними вся святыя.

¹⁶Целуйте друг друга лобзанием святым. Целуют вы вся Церкви Христовы.

¹⁷Молю же вы, братие, блюдитеся от творящих распри и раздоры, кроме учения, емуже вы научистеся, и уклонитеся от них:

¹⁸таковии бо Господеви нашему Иисусу Христу не работают, но своему чреву: иже благими словесы и благословением прельщают сердца незлобивых.

¹⁹Ваше бо послушание ко всем достиже. Радуюся же еже о вас. хощу же вас мудрых убо быти во благое, простых же в злое.

²⁰Бог же мира да сокрушит сатану под ноги вашя вскоре. Благодать Господа нашего Иисуса Христа с вами. Аминь.

²¹Целует вас тимофей споспешник мой, и лукий и иасон и сосипатр, сродницы мои.

²²Целую вы и аз тертий, написавый послание сие, о Господе.

²³Целует вы гаие странноприимец мой и Церкве всея. Целует вы ераст строитель градский, и куарт брат.

²⁴Благодать Господа нашего Иисуса Христа со всеми вами. Аминь.