Read Елизаветинская Библия, 1751 1-е Коринфянам 9 Bible Online

1-е Коринфянам 9 - Елизаветинская Библия, 1751 bible

1-е Коринфянам 9

¹Несмь ли апостол? Несмь ли свободь? Не Иисуса Христа ли Господа нашего видех? Не дело ли мое вы есте о Господе?

²Аще иным (и) несмь апостол, но обаче вам есмь: печать бо моего апостолства вы есте о Господе.

³Мой ответ востязующым мене сей есть.

⁴Еда не имамы власти ясти и пити?

⁵Еда не имамы власти сестру жену водити, яко и прочии апостоли, и братия Господня, и кифа?

⁶Или един аз и варнава не имамы власти еже не делати?

⁷Кто воинствует своими оброки когда? Или кто насаждает виноград, и от плода его не яст? Или кто пасет стадо, и от млека стада не яст?

⁸Еда по человеку сия глаголю? Не и закон ли сия глаголет?

⁹В моисеове бо законе писано: да не заградиши устну вола молотяща. Еда о волех радит Бог?

¹⁰Или нас ради всяко глаголет? Нас бо ради написася, яко о надежди должен есть оряй орати, и молотяй с надеждею своего упования причащатися.

¹¹Аще мы духовная сеяхом вам, велико ли, аще мы ваша телесная пожнем?

¹²Аще инии власти вашея причащаются, не паче ли мы? Но не сотворихом по области сей: но вся терпим, да не прекращение кое дамы благовествованию Христову.

¹³Не весте ли, яко делающии священная от святилища ядят? (и) служащии олтарю со олтарем делятся?

¹⁴Тако и Господь повеле проповедающым благовестие от благовестия жити.

¹⁵Аз же ни едино сотворих от сих. Не писах же сия, да тако будет о мне: добрее бо мне паче умрети, нежели похвалу мою кто да испразднит.

¹⁶Аще бо благовествую, несть ми похвалы, нужда бо ми належит: горе же мне есть, аще не благовествую.

¹⁷Аще убо волею сие творю, мзду имам: аще же неволею, строение ми есть предано.

¹⁸Кая убо ми есть мзда? Да благовествуяй без мзды положу благовестие Христово, во еже не творити ми по области моей в благовествовании.

¹⁹Свободен бо сый от всех, всем себе поработих, да множайшыя приобрящу:

²⁰бых иудеем яко иудей, да иудеи приобрящу: подзаконным яко подзаконен, да подзаконныя приобрящу:

²¹беззаконным яко беззаконен, не сый беззаконник Богу, но законник Христу, да приобрящу беззаконныя.

²²Бых немощным яко немощен, да немощныя приобрящу. Всем бых вся, да всяко некия спасу.

²³Сие же творю за благовестие, да сообщник ему буду.

²⁴Не весте ли, яко текущии в позорищи вси убо текут, един же приемлет почесть? Тако тецыте, да постигнете.

²⁵Всяк же подвизаяйся от всех воздержится: и они убо да истленен венец приимут, мы же неистленен.

²⁶Аз убо тако теку, не яко безвестно, тако подвизаюся, не яко воздух бияй:

²⁷но умерщвляю тело мое и порабощаю, да не како, иным проповедуя, сам неключимь буду.