Read Елизаветинская Библия, 1751 К Ефесянам 2 Bible Online

К Ефесянам 2 - Елизаветинская Библия, 1751 bible

К Ефесянам 2

¹И вас сущих прегрешеньми мертвых и грехи вашими,

²в нихже иногда ходисте по веку мира сего, по князю власти воздушныя, духа, иже ныне действует в сынех противления,

³в нихже и мы вси жихом иногда в похотех плоти нашея, творяще волю плоти и помышлений, и бехом естеством чада гнева, якоже и прочии:

⁴Бог же, богат сый в милости, за премногую любовь свою, еюже возлюби нас,

⁵и сущих нас мертвых прегрешеньми, сооживи Христом: благодатию есте спасени:

⁶и с ним воскреси, и спосади на небесных во Христе Иисусе,

⁷да явит в вецех грядущих презелное богатство благодати своея благостынею на нас о Христе Иисусе.

⁸Благодатию бо есте спасени чрез веру: и сие не от вас, Божии дар:

⁹не от дел, да никтоже похвалится.

¹⁰Того бо есмы творение, создани во Христе Иисусе на дела благая, яже прежде уготова Бог, да в них ходим.

¹¹Темже поминайте, яко вы, иже иногда языцы во плоти, глаголемии необрезание от рекомаго обрезания во плоти, рукотвореннаго,

¹²яко бесте во время оно без Христа, отчуждени жития израилева и чужди от завет обетования, упования не имуще и безбожни в мире:

¹³ныне же о Христе Иисусе вы, бывшии иногда далече, близ бысте кровию Христовою.

¹⁴Той бо есть мир наш, сотворивый обоя едино, и средостение ограды разоривый,

¹⁵вражду Плотию своею, закон заповедий ученьми упразднив, да оба созиждет собою во единаго новаго человека, творя мир,

¹⁶и примирит обоих во единем теле Богови крестом, убив вражду на нем:

¹⁷и пришед благовести мир вам, дальним и ближним,

¹⁸зане тем имамы приведение обои во единем Дусе ко Отцу.

¹⁹Темже убо ктому несте странни и пришелцы, но сожителе святым и приснии Богу,

²⁰наздани бывше на основании апостол и пророк, сущу краеугольну самому Иисусу Христу,

²¹о немже всяко создание составляемо растет в церковь святую о Господе:

²²о немже и вы созидаетеся в жилище Божие духом.