Read Елизаветинская Библия, 1751 К Ефесянам 4 Bible Online

К Ефесянам 4 - Елизаветинская Библия, 1751 bible

К Ефесянам 4

¹Молю убо вас аз юзник о Господе, достойно ходити звания, в неже звани бысте,

²со всяким смиреномудрием и кротостию, с долготерпением, терпяще друг другу любовию,

³тщащеся блюсти единение духа в союзе мира.

⁴Едино тело, един дух, якоже и звани бысте во единем уповании звания вашего:

⁵един Господь, едина вера, едино крещение,

⁶един Бог и Отец всех, иже над всеми и чрез всех и во всех нас.

⁷Единому же комуждо нас дадеся благодать по мере дарования Христова.

⁸Темже глаголет: возшед на высоту, пленил еси плен, и даде даяния человеком.

⁹А еже, взыде, что есть, точию яко и сниде прежде в долнейшыя страны земли?

¹⁰Сшедый, той есть и возшедый превыше всех небес, да исполнит всяческая.

¹¹И той дал есть овы убо апостолы, овы же пророки, овы же благовестники, овы же пастыри и учители,

¹²к совершению святых, в дело служения, в созидание тела Христова,

¹³дондеже достигнем вси в соединение веры и познания Сына Божия, в мужа совершенна, в меру возраста исполнения Христова:

¹⁴да не бываем ктому младенцы, влающеся и скитающеся всяким ветром учения, во лжи человечестей, в коварстве козней льщения:

¹⁵истинствующе же в любви, да возрастим в него всяческая, иже есть глава Христос,

¹⁶из негоже все тело, составляемо и счиневаемо приличне всяцем осязанием подаяния, по действу в мере единыя коеяждо части, возращение тела творит в создание самаго себе любовию.

¹⁷Сие убо глаголю и послушествую о Господе, ктому не ходити вам, якоже и прочии языцы ходят в суете ума их,

¹⁸помрачени смыслом, суще отчуждени от жизни Божия, за невежество сущее в них, за окаменение сердец их:

¹⁹иже в нечаяние вложшеся, предаша себе студодеянию, в делание всякия нечистоты в лихоимании.

²⁰Вы же не тако познасте Христа:

²¹аще убо слышасте его и о нем научистеся, якоже есть истина о Иисусе:

²²отложити вам, по первому житию, ветхаго человека, тлеющаго в похотех прелестных,

²³обновлятися же духом ума вашего,

²⁴и облещися в новаго человека, созданнаго по Богу в правде и в преподобии истины.

²⁵Темже отложше лжу, глаголите истину кийждо ко искреннему своему. зане есмы друг другу удове.

²⁶Гневайтеся и не согрешайте: солнце да не зайдет в гневе вашем:

²⁷ниже дадите места диаволу.

²⁸Крадый ктому да не крадет, но паче да труждается, делая своима рукама благое, да имать подаяти требующему.

²⁹Всяко слово гнило да не исходит из уст ваших, но точию еже есть благо к созданию веры, да даст благодать слышащым.

³⁰И не оскорбляйте духа святаго Божия, имже знаменастеся в день избавления.

³¹Всяка горесть, и гнев, и ярость, и кличь, и хула да возмется от вас, со всякою злобою:

³²бывайте же друг ко другу блази, милосерди, прощающе друг другу, якоже и Бог во Христе простил есть вам.