Read Елизаветинская Библия, 1751 К Ефесянам 5 Bible Online

К Ефесянам 5 - Елизаветинская Библия, 1751 bible

К Ефесянам 5

¹Бывайте убо подражателе Богу, якоже чада возлюбленная,

²и ходите в любви, якоже и Христос возлюбил есть нас, и предаде себе за ны приношение и жертву Богу в воню благоухания.

³Блуд же и всяка нечистота и лихоимство ниже да именуется в вас, якоже подобает святым:

⁴и сквернословие, и буесловие, или кощуны, яже неподобная, но паче благодарение:

⁵сие бо да весте, яко всяк блудник, или нечист, или лихоимец, иже есть идолослужитель, не имать достояния в Царствии Христа и Бога.

⁶Никтоже вас да льстит суетными словесы, сих бо ради грядет гнев Божий на сыны непокоривыя.

⁷Не бывайте убо сопричастницы сим.

⁸Бесте бо иногда тма, ныне же свет о Господе: якоже чада света ходите:

⁹плод бо духовный есть во всяцей благостыни и правде и истине:

¹⁰искушающе, что есть благоугодно Богови:

¹¹и не приюбщайтеся к делом неплодным тмы, паче же и обличайте.

¹²Бываемая бо отай от них, срамно есть и глаголати.

¹³Вся же обличаемая от света являются, все бо являемое свет есть:

¹⁴сего ради глаголет: востани, спяй, и воскресни от мертвых, и осветит тя Христос.

¹⁵Блюдите убо, како опасно ходите, не якоже немудри, но якоже премудри,

¹⁶искупующе время, яко дние лукави суть.

¹⁷Сего ради не бывайте несмысленни, но разумевайте, что есть воля Божия.

¹⁸И не упивайтеся вином, в немже есть блуд: но паче исполняйтеся духом,

¹⁹глаголюще себе во псалмех и пениих и песнех духовных, воспевающе и поюще в сердцах ваших Господеви,

²⁰благодаряще всегда о всех о имени Господа нашего Иисуса Христа Богу и Отцу,

²¹повинующеся друг другу в страсе Божии.

²²Жены, своим мужем повинуйтеся, якоже Господу,

²³зане муж глава есть жены, якоже и Христос глава Церкве, и той есть спаситель тела:

²⁴но якоже Церковь повинуется Христу, такожде и жены своим мужем во всем.

²⁵Мужие, любите своя жены, якоже и Христос возлюби Церковь, и себе предаде за ню,

²⁶да освятит ю, очестив банею водною в глаголе:

²⁷да представит ю себе славну Церковь, не имущу скверны, или порока, или нечто от таковых, но да будет свята и непорочна.

²⁸Тако должни суть мужие любити своя жены, яко своя телеса: любяй бо свою жену, себе самаго любит.

²⁹Никтоже бо когда свою плоть возненавиде, но питает и греет ю, якоже и Господь Церковь:

³⁰зане уди есмы тела его, от Плоти его и от костей его.

³¹Сего ради оставит человек отца своего и матерь, и прилепится к жене своей, и будета два в плоть едину.

³²Тайна сия велика есть: аз же глаголю во Христа и во Церковь.

³³Обаче и вы, по единому кийждо свою жену сице да любит, якоже (и) себе: а жена да боится (своего) мужа.