Read Елизаветинская Библия, 1751 К Колоссянам 3 Bible Online

К Колоссянам 3 - Елизаветинская Библия, 1751 bible

К Колоссянам 3

¹Аще убо воскреснусте со Христом, вышних ищите, идеже есть Христос о десную Бога седя:

²горняя мудрствуйте, (а) не земная.

³умросте бо, и живот ваш сокровен есть со Христом в Бозе:

⁴егда же Христос явится, живот ваш, тогда и вы с ним явитеся в славе.

⁵Умертвите убо уды вашя, яже на земли: блуд, нечистоту, страсть, похоть злую и лихоимание, еже есть идолослужение,

⁶ихже ради грядет гнев Божии на сыны противления.

⁷в нихже и вы иногда ходисте, егда живясте в них.

⁸Ныне же отложите и вы та вся: гнев, ярость, злобу, хуление, срамословие от уст ваших:

⁹не лжите друг на друга, совлекшеся ветхаго человека с деяньми его

¹⁰и облекшеся в новаго, обновляемаго в разум по образу создавшаго его,

¹¹идеже несть еллин, ни иудей, обрезание и необрезание, варвар и скиф, раб и свободь, но всяческая и во всех Христос.

¹²Облецытеся убо якоже избраннии Божии, святи и возлюбленни, во утробы щедрот, благость, смиреномудрие, кротость и долготерпение,

¹³приемлюще друг друга и прощающе себе, аще кто на кого имать поречение: якоже и Христос простил есть вам, тако и вы.

¹⁴Над всеми же сими (стяжите) любовь, яже есть соуз совершенства:

¹⁵и мир Божии да водворяется в сердцах ваших, в оньже и звани бысте во едином теле: и благодарни бывайте.

¹⁶Слово Христово да вселяется в вас богатно, во всякой премудрости: учаще и вразумляюще себе самех во псалмех и пениих и песнех духовных, во благодати поюще в сердцах ваших Господеви.

¹⁷И все, еже аще что творите словом или делом, вся во имя Господа Иисуса Христа, благодаряще Бога и Отца тем.

¹⁸Жены, повинуйтеся своим мужем, якоже подобает о Господе.

¹⁹Мужие, любите жены вашя, и не огорчайтеся к ним.

²⁰Чада, послушайте родителей (своих) во всем: сие бо угодно есть Господеви.

²¹Отцы, не раздражайте чад ваших, да не унывают.

²²Раби, послушайте по всему плотских господии (ваших), не пред очима точию работающе аки человекоугодницы, но в простоте сердца, боящеся Бога.

²³И всяко, еже аще что творите, от души делайте, якоже Господу, а не человеком,

²⁴ведяще, яко от Господа приимете воздаяние достояния: Господу бо Христу работаете.

²⁵А обидяй восприимет, еже обиде: и несть лица обиновения.