Read Елизаветинская Библия, 1751 К Колоссянам 4 Bible Online

К Колоссянам 4 - Елизаветинская Библия, 1751 bible

К Колоссянам 4

¹Господие, правду и уравнение рабом подавайте, ведяще, яко и вы имате Господа на небесех.

²В молитве терпите, бодрствующе в ней со благодарением:

³молящеся и о нас вкупе, да Бог отверзет нам двери слова, проглаголати тайну Христову, еяже ради и связан есмь:

⁴да явлю ю, якоже подобает ми глаголати.

⁵В премудрости ходите ко внешним, время искупующе.

⁶Слово ваше (да бывает) всегда во благодати, солию растворено, ведети, како подобает вам единому комуждо отвещавати.

⁷Иже о мне, вся скажет вам тихик, возлюбленный брат и верен служитель и соработник о Господе,

⁸егоже послах к вам на се истое, да разумеет яже о вас и утешит сердца ваша,

⁹со онисимом, верным и возлюбленным братом нашим, иже есть от вас: вся вам скажут, яже зде.

¹⁰Целует вы аристарх спленник мой, и марко анепсий варнавин, о немже приясте заповеди: аще приидет к вам, приимите его:

¹¹и иисус нареченный иуст, сущий от обрезания: сии едини споспешницы во Царство Божие, иже быша ми утешение.

¹²Целует вы епафрас, иже от вас, раб Иисуса Христа, всегда подвизаяйся о вас в молитвах, да будете совершени и исполнени во всяцей воли Божией.

¹³Свидетелствую бо о нем, яко имать ревность многу (и болезнь) о вас и о сущих в лаодикии и во иераполи.

¹⁴Целует вы лука врачь возлюбленный, и димас.

¹⁵Целуйте братию сущую в лаодикии, и нимфана, и домашнюю его церковь.

¹⁶И егда прочтется послание сие у вас, сотворите, да и в лаодикиистей Церкви прочтено будет, и написаное от лаодикии да и вы прочтете.

¹⁷И рцыте архиппу: блюди служение, еже приял еси о Господе, да довершиши е.

¹⁸Целование моею рукою павлею. Поминайте моя узы. Благодать со (всеми) вами. Аминь.