Read Елизаветинская Библия, 1751 Иисус Навин 10 Bible Online

Иисус Навин 10 - Елизаветинская Библия, 1751 bible

Иисус Навин 10

¹Егда же услыша адонивезек царь Иерусалимский, яко взя иисус гай и потреби его, якоже сотвори иерихону и царю его, тако сотвори и гаю и царю его, и яко сами вдашася живущии в гаваоне ко иисусу и ко израилю, и быша в них,

²и убояшася сами в себе зело: ведяху бо, яко град бяше велик гаваон, яко един от великих градов, и вси мужие иже в нем крепцы.

³И посла адонивезек царь Иерусалимский к еламу царю хевронску и фераану царю иеримуфску, и ко афию царю лахисску, и к давиру царю одолламску, глаголя:

⁴приидите, взыдите ко мне и помозите ми, да повоюем гаваона: вдашася бо сами ко иисусу и к сыном израилевым.

⁵И собрашася и взыдоша пять царей иевусейских: царь Иерусалимский и царь хевронский, и царь иеримуфский и царь лахисский и царь одолламский, сами и вси людие их, и обседоша гаваона и воеваша на него.

⁶И послаша живущии в гаваоне ко иисусу в полк израилев в галгалы, глаголюще: не отрешай руки твоея от раб твоих: взыди к нам скоро и помози нам, и изми нас: яко собрани суть на ны вси царие аморрейстии, живущии в горней.

⁷И взыде иисус от галгал, сам и вси людие воинстии с ним, всяк сильный крепостию.

⁸И рече Господь ко иисусу: не убойся их, яко в руце твои предах я: не останет от них ни един пред вами.

⁹И прииде на них иисус внезапу: всю бо нощь иде от галгал.

¹⁰И ужаси я Господь от лица сынов израилевых: и сокруши я Господь сокрушением великим в гаваоне: и погнаша я путем восхода вифоронска, и сечаху их даже до азика и до макида.

¹¹Внегда же бежати им от лица сынов израилевых до восхода вифоронска, и Господь верже на ня камение великое града с небесе даже до азика, и бысть множае умерших от града каменна, неже убиенных от сынов израилевых мечем на брани.

¹²Тогда глагола иисус ко Господу, в оньже день предаде Господь Бог аморреа под руку израилеву, егда сокруши их в гаваоне, и сокрушишася от лица израилева: и рече иисус: да станет солнце прямо гаваону, и луна прямо дебри елон.

¹³И ста солнце и луна в стоянии, дондеже отмсти Бог врагом их. Не сие ли есть писано в книгах праведнаго: и ста солнце посреде небесе и не идяше на запад в совершение дне единаго?

¹⁴И не бысть день таковый ниже прежде, ниже последи, еже послушати Богу тако гласа человеча, яко Господь споборствова израилю.

¹⁵И возвратися иисус и весь израиль с ним в полк в галгалы.

¹⁶И убегоша пять царие сии и скрышася в пещере яже в макиде.

¹⁷И поведаша иисусу, глаголюще: обретошася пять царие скрывшиися в пещере яже в макиде.

¹⁸И рече иисус: привалите камение велие ко устию пещеры и приставите над ними мужы стрещи их:

¹⁹вы же не стойте зде, гоняще вслед врагов ваших, и постигните останок их, и не дадите внити им во грады их, предаде бо я Господь Бог наш в руце наши.

²⁰И бысть егда преста иисус и вси сынове израилевы секуще их сечением великим зело даже до конца, и уцелевшии от них внидоша во грады тверды.

²¹И возвратишася вси людие в полк ко иисусу в макиду здрави, и не возскомле никтоже от сынов израилевых языком своим.

²²И рече иисус: отверзите устие пещеры и изведите ко мне пять царей сих из пещеры.

²³И сотвориша тако, и изведоша к нему пять царей из пещеры: царя Иерусалимска и царя хевронска, и царя иеримуфска и царя лахисска и царя одолламска.

²⁴И егда изведоша их ко иисусу, и созва иисус всего израиля и началники воинския ходящыя с ним, глаголя к ним: приступите и наступите ногами вашими на выи царей сих. И приступивше наступиша ногами своими на выи их.

²⁵И рече к ним иисус: не бойтеся их, ни ужасайтеся: мужайтеся и крепитеся, яко сице сотворит Господь всем врагом вашым, ихже вы повоюете.

²⁶И уби я иисус, и повеси я на пяти древесех: и быша висяще на древах даже до вечера.

²⁷И бысть при захождении солнца, повеле иисус, и сняша я с древес, и ввергоша я в пещеру, в нюже вбегоша тамо: и завалиша камением великим пещеру до днешняго дне.

²⁸Взяша же и макиду в той день, и избиша ю острием меча и царя ея, и потребиша их и все дышущее еже бяше в ней: и не остася никтоже в ней цел и избегший. И сотвориша царю макидску, якоже сотвориша царю иерихонску.

²⁹И отиде иисус и весь израиль с ним от макиды в левну, и облеже левну.

³⁰И предаде ю Господь в руце израилю: и взяша ю и царя ея, и избиша ю острием меча, и все дышущее в ней: и не остася в ней ни един цел и избегший. И сотвориша царю ея, якоже сотвориша царю иерихонску.

³¹И отиде иисус и весь израиль с ним от левны в лахис, и облеже его, и воеваше нань.

³²И предаде Господь лахис в руце израилевы: и взя его в день вторый, и избиша его острием меча (и все дышущее в нем), и потребиша его, якоже сотвориша левне.

³³Тогда взыде орам царь газерск, помогаяй лахису: и порази его иисус острием меча, и люди его, дондеже не остася от них ни един цел и избегший.

³⁴И отиде иисус и весь израиль с ним от лахиса во аглон, и облеже и, и воева на него.

³⁵И предаде и Господь в руце израилю: и взя и в той день, и изби и острием меча, и все дышущее в нем уби, и сотвори ему якоже и лахису.

³⁶И отиде иисус и весь израиль с ним в хеврон, и обсяде и:

³⁷и взя его, и порази его острием меча, и царя его, и вся веси его, и вся дышущая елика бяху в нем: не бе уцелевый: якоже сотвориша аглону, потребиша и и все дышущее, елика в нем бяху.

³⁸И обратися иисус и весь израиль с ним в давир: и обседше и,

³⁹взяша его и царя его и вся веси его, и поразиша и мечем, и потребиша и и все дышущее в нем, и не оставиша в нем ни единаго уцелевша: якоже сотвориша хеврону и царю его, тако сотвориша давиру и царю его, и якоже сотвориша левне и царю ея.

⁴⁰И порази иисус всю землю горную и нагев, и равную и асидоф, и вся цари его: не оставиша в нем ни единаго уцелевша: и все дышущее потребиша, якоже заповеда Господь Бог израилю.

⁴¹И изби их иисус от кадис-варни даже до газы, и всю землю госом даже до гаваона:

⁴²и вся цари сия и землю их взя иисус единою: яко Господь Бог израилев помогаше израилю.

⁴³И возвратися иисус и весь израиль с ним в полк в галгалы.