Read Елизаветинская Библия, 1751 Иисус Навин 11 Bible Online

Иисус Навин 11 - Елизаветинская Библия, 1751 bible

Иисус Навин 11

¹Егда же услыша иавин царь асорск, посла ко иоваву царю мадонску, и к царю семеронску и к царю ахиавску,

²и к царем иже в сидоне велицем и в горней, и в араву прямо хенерефу, и на поляну, и в нафеддор,

³и к приморским хананеам от восток, и к приморским аморреом и хеттеом, и ферезеом и иевусеом, иже на горе, и евеом, и иже под аермоном, в землю массифа.

⁴И изыдоша сии и царие их с ними, людие мнози, яко песок иже при краи моря множеством, и кони и колесницы многи зело.

⁵И снидошася вси царие сии, и приидоша вкупе, и ополчишася при воде маррон воевати на израиля.

⁶И рече Господь ко иисусу: не убойся от лица их, яко заутра в сей час аз предам их язвенных пред сыны израилевы: конем их жилы пресечеши и колесницы их да сожжеши огнем.

⁷И прииде иисус и вси людие воинстии с ним на них к воде марронстей внезапу, и нападоша на ня в горней.

⁸И предаде их Господь под руце израилевы: и секуще их, прогнаша даже до сидона великаго и до масрефоф-маима и до поль массифских к востоком: и изсекоша их, дондеже не остася в них ни един цел и избегший.

⁹И сотвори им иисус, якоже заповеда ему Господь: конем их жилы пресече и колесницы их сожже огнем.

¹⁰И обратися иисус в то время, и взя асор, и царя его уби мечем: асор бо бе прежде обладающий всеми царствы сими:

¹¹и изби все дышущее, еже в нем бысть, острием меча, и потребиша вся, и не остася в нем все дышущее: и асор запалиша огнем.

¹²И вся грады царств сих и вся цари их взя иисус и изби я мечем, и потреби их, якоже повеле им моисей раб Господень.

¹³Но вся грады крепки не запали израиль, точию асор един запали иисус.

¹⁴И вся корысти их и вся скоты их плениша себе сынове израилевы: людий же всех потребиша мечем, дондеже погубиша их, и не оставиша от них ни единаго дышущаго.

¹⁵Якоже повеле Господь моисею рабу своему, тако моисей заповеда иисусу: и тако сотвори иисус, не преступи ни единаго же от всех, яже заповеда Господь моисею.

¹⁶И взя иисус всю землю горную и всю землю нагев, и всю землю госомску, и равную, и яже на запад, и гору израилеву, и поля яже при горе,

¹⁷от горы хелха, и яже восходит к сеиру, и даже до валгада, и поле ливана под горою аермон: и вся цари их взя и изби.

¹⁸И многи дни сотвори иисус с цари сими брань:

¹⁹и не бе ни единаго града, егоже не предаде Господь сыном израилевым, кроме евеа обитающаго в гаваоне: всех взяша бранию:

²⁰яко Господем бысть укрепитися их сердцу, сопротивитися на брани противу израиля, да потребят их, яко да не дастся им милость, но да потребятся, якоже глагола Господь к моисею.

²¹И прииде иисус в то время, и потреби (вся) енакимы от горныя, от хеврона и от давира и от анова, и от всея горы израилевы и от всея горы иудины, с грады их, и потреби я иисус:

²²не остася ни един енаким от сынов израилевых, но точию в газе и в гефе и во асидофе осташася.

²³И взя иисус всю землю, якоже заповеда Господь моисею: и даде ю иисус в наследие израилю, разделением по племеном их. И преста земля воюема быти.