Read Елизаветинская Библия, 1751 Иисус Навин 13 Bible Online

Иисус Навин 13 - Елизаветинская Библия, 1751 bible

Иисус Навин 13

¹Иисус же состареся прошед дни. И рече Господь ко иисусу: ты состарелся еси денми, и земля остася многа в наследие:

²и сия земля оставшаяся: пределы филистимли, гесури и хананей,

³от необитаемыя, яже от лица египта даже до предел аккаронских ошуюю хананеов, причисляется пятим областем филистимским: газеу и азотию, и аскалониту и гетфею, и аккарониту и евею:

⁴от феман и всей земли ханаанстей прямо газе, и сидонии даже до афека, даже до предел аморрейских:

⁵и всю землю гавли филистимлю, и весь ливан от восток солнца, от галгал под горою аермон даже до входа емаф:

⁶всяк обитающий в горней от ливана даже до масрефофмаима, всех сидонян аз потреблю от лица израилева: но раздай ю во жребий израилю, якоже заповедах тебе:

⁷и ныне раздели землю сию в наследие девяти племеном и полплемени манассиину от иордана даже до моря великаго, к западу солнца даси ю: море великое предел будет.

⁸Дву же племеном и полуплемени манассиину, рувиму и гаду, даде моисей об ону страну иордана: к востоком солнца даде им моисей раб Господень,

⁹от ароира, иже есть на устии водотечи арнони, и град иже посреде дебри, и весь мисор от медавана:

¹⁰вся грады сиона царя аморрейска, иже царствова во есевоне, даже до предел сынов аммоних:

¹¹и галаад, и пределы гесури, и махафи, всю гору аермон, и всю васанитску до елхи:

¹²все царство огово в васанитиде, иже царствова во астарофе и во едраине: сей остася (един) от исполинов, и уби его моисей, и потреби.

¹³И не потребиша сынове израилевы гесура и махафа и хананеа: и живяше царь гесури и махафи в сынех израилевых даже до сего дне.

¹⁴Токмо племени левиину не дадеся наследие: Господь Бог израилев, сам наследие их, якоже рече им Господь. И сие разделение, еже раздели моисей сыном израилевым (по племеном их) во аравофе моавли об ону страну иордана противу иерихона.

¹⁵И даде моисей племени сынов рувимлих по сонмом их:

¹⁶и быша им пределы от ароира, иже есть прямо дебри арнонския, и град, иже есть в дебри арнонстей,

¹⁷и всю землю мисорску даже до есевона, и вся грады иже суть в мисоре, и девор, и вамоф-ваал, и домы веелмони,

¹⁸и иасса и кедимофа и мифааф,

¹⁹и кариафем и севама, и сарф и сиор на горе енак,

²⁰и веффогор и асидоф-фасга и вифсимуф,

²¹и вся грады мисорски, и все царство сиона царя аморрейска, егоже уби моисей самаго, и старейшины мадиамли, и евиа и рокома, и сура и ура и ровека, князи сиорския, и живущих на земли (той):

²²и валаама сына веорова волхва убиша мечем сынове израилевы в сражении.

²³Быша же пределы рувимли, иордан предел. Сие наследие сынов рувимлих по сонмом их, грады их и села их.

²⁴Даде же моисей сыном гадовым по сонмом их,

²⁵и быша им пределы иазир: вси гради галаади и полземли сынов аммоних до ароира, иже есть пред лицем раввафа:

²⁶и от есевона до рамофа к масфе, и вотаниму, и манаиму до предел давировых,

²⁷и во емеке вифарам и вифнамра, и сохоф и сафон, и прочее царство сиона царя есевонска: и иордан определяет даже до страны моря хенереф, об ону страну иордана от восток.

²⁸Сие наследие сынов гадовых по сонмом их и по градом их и селам их.

²⁹И даде моисей полуплемени манассиину по сонмом их,

³⁰и быша пределы их от манаима, и все царство васанско, и все царство ога царя васанска, и вся веси иаира, яже суть в васанитиде, шестьдесят градов:

³¹и пол галаада, и во астарофе, и во едраине, грады царства огова в васанитиде: и дашася сыном махировым, сыном манассииным, и половине сынов махировых по сонмом их.

³²Сии суть, имже даде наследие моисей об ону страну иордана во аравофе моавли, прямо иерихона на востоки.

³³Племени же левиину не даде моисей наследия: понеже сам Господь Бог израилев наследие его есть, якоже глагола им.