Read Елизаветинская Библия, 1751 Иисус Навин 19 Bible Online

Иисус Навин 19 - Елизаветинская Библия, 1751 bible

Иисус Навин 19

¹И изыде вторый жребий симеону, племени сынов симеоновых по сонмом их, и бысть наследие их посреде жребия сынов иудиных.

²И бысть жребий их вирсавее и савее и молада,

³и асерсуал и вафул, и велвола и асом,

⁴и елфулад и ерма,

⁵и секелаг и вефаммаргасвоф, и асерсусим

⁶и вефалваф, и села их: грады тринадесять и веси их.

⁷Аин и реммоф, и еефер и асам, грады четыри и веси их:

⁸и вся предградия, яже окрест градов сих даже до ваалферирраммоф, идущих во иамеф к ливу. Сие наследие племен сынов симеоновых по сонмом их.

⁹От жребия иудина наследие племене сынов симеоновых, яко бысть часть сынов иудиных болшая нежели их: и наследиша сынове симеоновы посреде жребия их.

¹⁰И изыде жребий третий завулону по сонмом их: и будут пределы наследия их до сарида:

¹¹и восходят пределы их к морю и мариле, и дойдут к давасефу, и снидутся в дебрь, яже есть к лицу иекнама,

¹²и обратятся от сарида противу от востоков самес на пределы хасалоф-фавор, и пройдут к даврафу, и взыдут к иафаги:

¹³и оттуду обыдут супротив на востоки в гефаефер, во град касим, и пройдут на реммонам мафарим аннуа,

¹⁴и обыдут пределы к северу на еннафоф, и будет исход их к гаю иеффаил,

¹⁵и каттаф и наалол, и семрон и иадила и вифлеем: грады дванадесять и веси их.

¹⁶Сие наследие племене сынов завулоновых по сонмом их, грады их и веси их.

¹⁷И иссахару изыде жребий четвертый, сыном иссахаровым по сродством их,

¹⁸и быша пределы их иезраель и ахаселоф и сунам,

¹⁹и аферарим и сиан, (и ренаф) и анахареф,

²⁰и раввоф и кесион и аеме,

²¹и рамаф и инганним, и инадда и веффасис:

²²и снидутся пределы к фавору и к сасимафу к морю, и вефсмас, и будет его исход предел иордан: грады шестьнадесять и веси их.

²³Сие наследие племене сынов иссахаровых по сонмом их, грады и предградия их.

²⁴И изыде жребий пятый племене сынов асировых по сонмом их,

²⁵и быша пределы их хелкаф и ооли, и ватне и ахсаф,

²⁶и елимелех и амад и масал: и приближатся к кармилу к морю, и сиору и лаванафу,

²⁷и обратятся от восток солнца в виф-дагон, и приближатся к завулону, и в гай иеффаил к северу, (и внидут пределы асафа) в виф-аемек, и да идут по долине аниила, и пройдут в хавол ошуюю,

²⁸и ахран и роов, и аммон и кана, даже до сидона великаго:

²⁹и возвратятся пределы в раму, и даже до града тверда тириан, и возвратятся пределы до сусы, и будет исход его море, и от ужа в ахзиф,

³⁰и амма и афек и раов: грады двадесять два и веси их.

³¹Сие наследие племене сынов асировых по сонмом их, грады их и веси их.

³²И неффалиму изыде жребий шестый, сыном неффалимлим по сонмом их,

³³и быша пределы их меелеф и милон, и весенаним и арме, и накев и иавнил, даже до лаккун: и быша исходи их иордан:

³⁴и возвратятся пределы к морю в азаноф-фавор, и пройдут оттуду во икок, и приткнутся к завулону от юга, и асиру приближатся к морю, и ко иуде иордан от восток солнца.

³⁵И грады ограждени тириан, тир и амаф, и реккаф и хенероф,

³⁶и адами и рама и асор,

³⁷и кедес и едраи и источник асор,

³⁸и иарион и магдалиил, оран и вефанаф и фасмус: грады девятьнадесят и веси их.

³⁹Сие наследие племене сынов неффалимлих по сродству их, грады и предградия их.

⁴⁰И дану и племени сынов дановых по сонмом их изыде жребий седмый,

⁴¹и быша пределы их сараа и есфаол и грады самес,

⁴²и саламинь и еалон и иефла,

⁴³и елон и фамна и аккарон,

⁴⁴и елфеко и гавафон и ваафоф,

⁴⁵и иуф и ваниварак и гефреммон,

⁴⁶и от моря иераконска, и ираккон, предел близ иоппы, и изыде предел сынов дановых от них.

⁴⁷И изыдоша сынове дановы и воеваша ласем, и взяша его и поразиша его острием меча: и обиташа в нем, и нарекоша имя его ласендан, по имени дана отца своего. И аморрей остася жити во еломе и в саламине: и отяготе рука ефремля на них, и быша им данницы.

⁴⁸Сие наследие племене сынов дановых по сонмом их, грады их и веси их. И не истребиша сынове дановы аморреа озлобляющаго их на горе, и не даяху им аморрее исходити на юдоль, и утесниша от них предел части их.

⁴⁹И совершиша разделяти землю в пределех ея: и даша сынове израилевы жребий иисусу сыну навину повелением Господним среде себе,

⁵⁰и даша ему град, егоже проси, фамнаф-сараи, иже есть в горе ефраим: и созда град, и вселися в нем.

⁵¹Сия разделения, яже разделиша елеазар жрец и иисус навин и князи отечеств в племенех израилевых по жребиям в силоме пред Господем, у дверий скинии свидения. И скончаша делити землю.