Read Елизаветинская Библия, 1751 Иисус Навин 2 Bible Online

Иисус Навин 2 - Елизаветинская Библия, 1751 bible

Иисус Навин 2

¹И посла иисус сын навин из саттина два юношы соглядати втай, глаголя: взыдите и видите землю и иерихон. И шедша два юношы внидоста во иерихон и внидоста в дом жены блудницы, ейже имя раав: и витаста тамо.

²И поведаша царю иерихонскому, глаголюще: се, мужие внидоша семо (в сию нощь) от сынов израилевых соглядати землю.

³И посла царь иерихонский и рече к рааве, глаголя: изведи мужы вшедшыя в дом твой нощию: соглядати бо землю приидоша.

⁴И поемши жена два мужа, сокры их: и рече им, глаголющи: приидоша ко мне мужие, но не вем откуду быша:

⁵егда же врата затворяху в сумраки, и мужие изыдоша: не вем камо поидоша: пожените скоро вслед их, аще постигнете их.

⁶Она же возведе я на храмину и сокры я в паздере льняне собранем у нея на храмине.

⁷И мужие гнаша вслед их путем ко иордану к преходом, и врата затворены быша.

⁸И бысть егда изыдоша женущии вслед их, и сии прежде неже уснути им, и она взыде к ним на храмину и рече к ним:

⁹вем, яко предаде Господь землю (сию) вам: нападе бо страх ваш на ны, и ужасошася вси обитающии на земли от лица вашего:

¹⁰слышахом бо, яко изсуши Господь Бог море чермное пред лицем вашим, егда исхождасте из египта, и елика сотвористе двоим царем аморрейским, иже быша об ону страну иордана, сиону и огу, ихже потребисте:

¹¹и слышавше мы ужасохомся в сердцы нашем, и не ста ктому дух ни во единем от нас от лица вашего: яко Господь Бог ваш, Бог на небеси горе и на земли доле:

¹²и ныне кленитеся мне Господем Богом (вашим), яко аз творю милость вам, да сотворите и вы милость в дому отца моего, и дадите ми знамение истинно:

¹³и оживите дом отца моего, и матерь мою, и братию мою, и сестры моя, и вся, елика суть им, и измите душы нашя от смерти.

¹⁴И рекоша ей мужие: душа наша вместо вас на смерть, аще ныне не объявиши нас. Она же рече: и будет егда предаст Господь вам град (сей), сотворите мне милость и истину.

¹⁵И свеси их на верве окном: яко дом ея при стене, и при стене сия живяше:

¹⁶и рече им: отидите в гору, да не срящут вас гонящии, и скрыйтеся тамо три дни, дондеже возвратятся гонящии вслед вас: и по сих отидете в путь ваш.

¹⁷И реша к ней мужие: неповинни есмы клятве сей твоей, еюже закляла еси нас:

¹⁸се, мы входим в часть града, и поставиши знамение, вервь червлену, сию да обяжеши у окна, имже спустила еси нас: отца же твоего и матерь твою, и братию твою и весь дом отца твоего да собереши к себе в дом твой:

¹⁹и будет всяк, иже аще изыдет из дверий дому твоего вон, сам себе повинен будет, мы же неповинни (будем) клятве твоей сей: и елицы аще с тобою будут в дому твоем, мы будем повинни, аще рука прикоснется их:

²⁰аще же кто нас обидит, или открыет словеса наша сия, будем неповинни клятве твоей сей, еюже закляла еси нас.

²¹И рече им: по словеси вашему тако да будет. И отпусти их, и отидоша: и привяза вервь червлену у окна.

²²И отидоша, и проидоша в гору, и пребыша тамо три дни, дондеже возвратишася гнавшии. И искаша гонящии по всем путем, и не обретоша.

²³И возвратистася два юношы и снидоста с горы: и преидоста (иордан) ко иисусу сыну навину, и поведаста ему вся случившаяся има:

²⁴и реста ко иисусу: яко предаде Господь Бог наш в руце наши всю землю, и убояшася вси живущии на земли той от нас.