Read Елизаветинская Библия, 1751 Иисус Навин 21 Bible Online

Иисус Навин 21 - Елизаветинская Библия, 1751 bible

Иисус Навин 21

¹И приидоша старейшины отечеств сынов левииных к елеазару жерцу и ко иисусу сыну навину и к старейшинам отечеств от племен сынов израилевых,

²и реша к ним в силоме в земли ханаани, глаголюще: заповеда Господь рукою моисеовою дати нам грады еже обитати, и окрестная их предградия скотом нашым.

³И даша сынове израилевы левитом от участий своих по повелению Господню грады сия и окрестная предградия их.

⁴И изыде жребий сонму каафову, и бысть сыном аароним жерцем левитом от племене иудина и от племене симеоня и от племене вениаминя по жребием грады тринадесять:

⁵и сыном каафовым оставшымся от (сродства) племене ефремова и от племене данова и от полуплемене манассиина по жребию грады десять:

⁶и сыном гирсоним от племене иссахарова и от племене асирова, и от племене неффалимля и от полуплемене манассиина (еже) в васане, по жребию грады тринадесять:

⁷и сыном мерариным по сонмом их, от племене рувимля и от племене гадова и от племене завулоня, по жребию грады дванадесять.

⁸И даша сынове израилевы левитом грады сия и окрестная их, якоже заповеда Господь моисею, по жребию.

⁹И даде племя сынов иудиных и племя сынов симеоновых и племя сынов вениаминовых грады сия: и нарекоша по имени.

¹⁰И быша сыном аароновым от сонма каафова сынов левииных, яко сим бысть жребий первый.

¹¹И даде им кариафарвок, митрополь сынов енаковых (сей есть хеврон в горе иудине), и окрестная их.

¹²И села града (сего) и веси его даде иисус халеву сыну иефонниину во обдержание его.

¹³И сыном аарона жерца даде град убежище убившему хеврон и отлученная яже к нему:

¹⁴и левну и отлученная яже к ней: и иефер и отлученная яже к нему: и есфемо и отлученная яже к нему:

¹⁵и олон и отлученная яже к нему: и давир и отлученная яже к нему:

¹⁶и аин и отлученная ему: и иетта и отлученная ему: и вефсамис и отлученная ему: грады девять от дву племен сих.

¹⁷И от племене вениаминя гаваон и отлученная ему: и гавее и окрестная его:

¹⁸и анафоф и окрестная его: и алмон и окрестная его: грады четыри.

¹⁹Вси грады сынов аароновых жерцев, грады тринадесять и окрестная их.

²⁰И сонмом сынов каафовых левитом, оставлшымся от сынов каафовых, и бысть град пределов их от племене ефремова.

²¹И даша им град убежище убившему сихем и окрестная его в горе ефремли: и газер и окрестная его:

²²и кавсаим и окрестная его: и вефорон и окрестная его: грады четыри.

²³И от племене данова елфеко и окрестная его: и гавефон и окрестная его:

²⁴и елон и окрестная его: и гефреммон и окрестная его: грады четыри.

²⁵И от полуплемене манассиина фаанах и окрестная его: и вефсам и окрестная его: града два.

²⁶Вси грады десять и окрестная их сонмом сынов каафовых оставлшымся.

²⁷И сыном гирсоним сродником левитским, от полуплемене манассиина, грады отлученныя убившым, голан в васанитиде и окрестная его: и веесфера и окрестная его: града два.

²⁸И от племене иссахарова кисион и окрестная его: и девраф и окрестная его:

²⁹и иермоф и окрестная его: и источник писмен и окрестная его: грады четыри.

³⁰И от племене асирова масаал и окрестная его: и авдон и окрестная его:

³¹и фелкаф и окрестная его: и роов и окрестная его: грады четыри.

³²И от племене неффалимова град определенный убившему кедес в галилеи и окрестная его: и емафдор и окрестная его: и ноеммон и отлученная его: грады три.

³³Вси грады гирсоновы по сонмом их, грады тринадесять и отлученная их.

³⁴И сонму сынов мерариных левитом прочым, от племене сынов завулоних, иекнаам и окрестная его: и карфа и окрестная его:

³⁵и дамна и окрестная его: и наалол и окрестная его: грады четыри.

³⁶И об ону страну иордана ко иерихону от племене рувимова даде град убежище убившему восор в пустыни мисор и окрестная его: и иазир и окрестная его:

³⁷и гедсон и окрестная его: и масфа и окрестная его: грады четыри.

³⁸И от племене гадова град убежища убившему рамоф в галааде и окрестная его: и манаим и окрестная его:

³⁹и есевон и окрестная его: и иазир и окрестная его: грады четыри.

⁴⁰Вси грады сыном мерариным по сонмом их, оставлшихся от племене левиина, и быша пределы их грады дванадесять.

⁴¹Вси грады левитстии посреде обдержания сынов израилевых четыредесять и осмь градов и окрестная их, окрест градов сих:

⁴²град и окрестная окрест града: тако всем градом сим. И соверши иисус разделивый землю в пределех ея: и даша сынове израилевы часть иисусу повелением Господним: даша ему град, егоже проси: фамнасахар даша ему на горе ефремове. И созда иисус град, егоже проси, и вселися в нем. И взя иисус ножы каменныя, имиже обрезова сыны израилевы, родившыяся на пути в пустыни, яко не обрезашася в пустыни, и положи я во фамнасахаре.

⁴³И даде Господь израилю всю землю, юже клятся дати отцем их: и наследиша ю и вселишася в ней.

⁴⁴И упокои Господь их окрест, якоже клятся отцем их: не воста никтоже противу им от всех врагов их: и вся враги их предаде им Господь в руки их.

⁴⁵Не оскуде слово (ни едино) от всех глагол благих, яже рече Господь сыном израилевым: вся собышася.