Read Елизаветинская Библия, 1751 Иисус Навин 23 Bible Online

Иисус Навин 23 - Елизаветинская Библия, 1751 bible

Иисус Навин 23

¹И бысть по днех мнозех, егда упокои Господь Бог израиля от всех врагов его иже окрест, и иисус состареся прошед дни.

²И созва иисус вся сыны израилевы и старейшины их, и князи их и судии их и книгочия их, и рече к ним: аз состарехся и проидох дни:

³вы же видесте вся, елика сотвори Господь Бог ваш всем языком сим от лица вашего, зане Господь Бог наш споборствовавый нам:

⁴видите, яко низвергох вам языки оставшыяся вам сия во жребиих племеном вашым, от иордана вся языки потребих, и от моря великаго, еже определит на запад солнца:

⁵Господь же Бог ваш сам потребит их от лица вашего, дондеже погибнут, и послет на ня звери дивия, дондеже потребит их и цари их от лица вашего, и наследите землю их, якоже глагола вам Господь Бог ваш:

⁶укрепитеся убо зело хранити и творити вся написанная в книгах закона моисеова, да не уклонитеся от него на десно или на лево:

⁷яко да не внидете во языки оставшыяся сия, и имена богов их да не возименуются в вас, ниже да кленетеся ими, ниже да послужите им, ниже поклонитеся им:

⁸но токмо Господу Богу вашему прилепитеся, якоже твористе до сего дне:

⁹и потреби Господь от лица вашего языки велики и сильны, и никто противоста вам до сего дне:

¹⁰един от вас прогна тысящы, яко Господь Бог ваш споборствоваше вам:

¹¹и сохраните зело любити Господа Бога вашего:

¹²аще бо отвратитеся и приложитеся ко оставшымся языком сим, иже с вами, и браки сотворите с ними, и смеситеся с ними, и они с вами,

¹³ведением уведите, яко не приложит Господь потребити языки сия от лица вашего: и будут вам в сети и в соблазны, и в гвоздия в пятах ваших и в стрелы во очесех ваших, дондеже погибнете от земли благия сея, юже даде вам Господь Бог ваш:

¹⁴аз же днесь отхожду в путь, якоже и вси иже на земли: и познаете всем сердцем вашим и душею вашею, яко ни едино слово отпаде от всех словес благих, яже рече Господь Бог ваш к вам: вся приходят вам, и не разнствова от них ни едино слово:

¹⁵и будет, имже образом приходят на вас вся словеса добрая, яже глагола Господь Бог к вам, тако наведет Господь на вы вся словеса злая, дондеже потребит вы от земли благия сея, юже даде вам Господь Бог ваш:

¹⁶внегда преступите завет Господа Бога вашего, егоже заповеда вам, и шедше послужите богом иным и поклонитеся им: и разгневается яростию Господь на вы, и погибнете скоро от земли благия, юже даде Господь вам.