Read Елизаветинская Библия, 1751 Иисус Навин 4 Bible Online

Иисус Навин 4 - Елизаветинская Библия, 1751 bible

Иисус Навин 4

¹И егда скончаша вси людие преходяще иордан, и рече Господь к иисусу, глаголя:

²поими дванадесять мужей от людий, мужа единаго от коегождо племене,

³повели им, глаголя: возмите от среды иордана, идеже стояша нози жречестии, готовых дванадесять каменей, и изнесше я с собою, положите в полце вашем, идеже станете тамо в нощи.

⁴И призвав иисус дванадесять мужей славных от сынов израилевых, единаго от коегождо племене, рече им:

⁵идите предо мною пред лицем Господним в средину иордана: и взем оттуду кийждо камень един да возложит на рамена своя, по числу племен (сынов) израилевых:

⁶да будут вам сии в знамение посреде вас лежаще всегда, да егда вопросит тебе утро сын твой, глаголя: что суть камение сие вам?

⁷и ты возвестиши сыну твоему, глаголя: яко оскуде иордан река от лица кивота завета Господа всея земли, егда прехождаше его, и изсяче вода иорданова: и будут вам камение сие в память сынов израилевых даже до века.

⁸И сотвориша тако сынове израилевы, якоже заповеда Господь иисусу: и вземше дванадесять каменей от среды иордана, якоже заповеда Господь иисусу в скончании прехождения сынов израилевых, и принесоша их с собою в полк, и положиша их тамо.

⁹Постави же иисус и другия дванадесять каменей в самем иордане на месте, идеже стояху нози жерцев воздвизающих кивот завета Господня, и суть тамо даже до сего дне.

¹⁰Стояху же жерцы воздвизающии кивот завета Господня во иордане, дондеже сконча иисус вся, елика заповеда Господь иисусу поведати людем, по всем, елика заповеда моисей иисусу: и потщашася людие, и преидоша.

¹¹И бысть егда скончаша вси людие преходити (иордан), прейде и кивот завета Господня, и камение пред ними.

¹²И преидоша сынове рувимли и сынове гадовы и пол племене манассиина устроены пред сынми израилевы, якоже заповеда им моисей:

¹³четыредесять тысящ вооружени на рать преидоша пред Господем на брань ко граду иерихону.

¹⁴В той день возвеличи Господь иисуса пред всем родом израилевым: и бояхуся его, якоже бояхуся моисеа, елико время поживе.

¹⁵И рече Господь ко иисусу, глаголя:

¹⁶заповеждь жерцем, воздвизающым кивот завета свидения, изступити из иордана.

¹⁷И заповеда иисус жерцем, глаголя: изыдите из иордана.

¹⁸И бысть егда изыдоша жерцы воздвизающии кивот завета Господня от среды иордана, и поставиша ноги на сусе, и устремися вода иорданова на место и пойде якоже вчера и третияго дне по всему краю.

¹⁹И людие взыдоша от иордана в десятый день перваго месяца: и ополчишася сынове израилевы в галгалех на стране, яже на восток солнца от иерихона.

²⁰И дванадесять камения сия, яже взя от иордана, постави иисус в галгалех, и рече к сыном израилевым, глаголя:

²¹егда вопросят вас сынове ваши, глаголюще: что суть камение сие?

²²возвестите сыном вашым: яко по суху прейде израиль иордан сей,

²³изсушившу Господу Богу вашему воду иорданю пред ними, дондеже преидоша, якоже сотвори Господь Бог ваш чермному морю, еже изсуши Господь Бог ваш пред вами, дондеже преидохом:

²⁴да уведят вси языцы земнии, яко рука Господня крепка есть, и вы да чтете Господа Бога вашего во всякое время.