Read Елизаветинская Библия, 1751 Иисус Навин 8 Bible Online

Иисус Навин 8 - Елизаветинская Библия, 1751 bible

Иисус Навин 8

¹И рече Господь ко иисусу: не бойся, ниже ужасайся: поими с собою вся мужы воинския, и востав взыди в гай: се, предах в руце твои царя гайска и землю его, и люди его и град его:

²и да сотвориши гаю и царю его, якоже сотворил еси иерихону и царю его: и плен его и скоты его да плениши себе: устрой же себе подсаду граду за собою.

³И воста иисус и вси мужие воинстии, да внидут в гай: и избра иисус тридесять тысящ мужей воинских сильных крепостию и посла их нощию,

⁴и заповеда им, глаголя: вы скрыйтеся за градом: не далече будите от града зело, и будите вси готови:

⁵аз же и вси людие иже со мною приступим ко граду: и будет егда изыдут живущии в гаи в сретение нам, якоже и прежде, и побегнем от лица их:

⁶и егда изыдут вслед нас, отторгнем их от града: и рекут: бежат сии от лица нашего, якоже и прежде:

⁷вы же востанете от подсады, и пойдете во град, и предаст его Господь Бог наш в руце ваши:

⁸и будет егда возмете град, запалите его огнем, по словеси сему сотворите: се, заповедаю вам.

⁹И посла их иисус, и идоша в подсаду: и седоша между вефилем и между гаием, от моря гаиа.

¹⁰И востав иисус заутра, согляда люди: и взыде сам и старцы израилтестии пред людьми в гай.

¹¹И вси людие воинстии с ним взыдоша, и идуще приидоша сопротив града от востоков: и подсады града от моря.

¹²И ополчишася от севера гаиа, и (бысть) дебрь между ими и между гаием. И взя яко пять тысящ мужей, и положи их на подсаду между вефилем и гаием от запада гаиа.

¹³И поставиша людие весь полк от севера града, а прочая его от моря града. И пойде иисус в нощь ону посреде дебри.

¹⁴И бысть егда увиде царь гайский, потщася, и воста рано и изыде в сретение им прямо на брань, сам и вси людие его с ним во время, пред лицем подсады: он же не ведяше, яко подсада ему есть за градом (его).

¹⁵И увиде, и отиде иисус и весь люд от лица их, и побеже путем пустыни,

¹⁶И укрепися весь люд гнати вслед их, и погнаша вслед сынов израилевых, и отступиша от града.

¹⁷(И) не остася никтоже в гаи и вефили, иже не погна вслед израиля: и оставиша град отверст, и гнаша вслед израиля.

¹⁸И рече Господь ко иисусу: простри руку твою с копием, еже в руце твоей, на град, зане в руку твою предах его: и подсады востанут вскоре от места своего. И простре иисус руку свою и с копием на град.

¹⁹И подсады восташа скоро от места своего: и изыдоша, егда простре руку, и внидоша во град, и взяша его: и потщавшеся запалиша град огнем.

²⁰И озревшеся обитатели гайстии вспять себе, узреша дым восходящь от града до небесе, и ктому не имеша камо побегнути, семо или овамо: людие же бегущии в пустыню обратишася на гонящих.

²¹Иисус же и весь израиль увидеша, яко взяша подсады град, и яко восходит дым градный до небесе: и обратившеся избиша мужей гайских.

²²И сии изыдоша из града противу им, и быша посреде полка израилева, сии отсюду и сии отюнуду: и избиша их, дондеже не остася ни един от них цел, ни убежа.

²³И царя гайска яша жива, и приведоша его ко иисусу.

²⁴И бысть егда престаша сынове израилевы секуще всех сущих в гаи и сущих на полях и на горе исхода, идеже гониша их, и падоша вси острием меча на ней до конца: и обратися иисус в гай и посече их мечем.

²⁵И быша вси падшии в той день от мужеска полу и до женска дванадесять тысящ, вси живущии в гаи.

²⁶Иисус же не обрати руки своея, юже простре с копием, дондеже прокля всех обитающих в гаи.

²⁷Кроме скотов (их) и имения, яже во граде онем, вся плениша себе сынове израилевы по повелению Господню, якоже повеле Господь иисусу.

²⁸И запали град иисус огнем: землю необитаему во век положи его даже до сего дне.

²⁹И царя гайска повеси на древе сугубем: и бяше на древе до вечера: и заходящу солнцу повеле иисус, и сняша тело его с древа, и повергоша и в ров пред враты града: и насыпа над ним громаду велику камения даже до сего дне.

³⁰Тогда созда иисус олтарь Господу Богу израилеву на горе гевал,

³¹якоже заповеда моисей раб Господень сыном израилевым, и якоже написася в законе моисеове, олтарь от камений всецелых, на нихже не возложися железо: и вознесе тамо всесожжения Господу и жертву спасения.

³²И написа иисус на камениих вторый закон, закон моисеов, егоже написа пред сыны израилевыми.

³³И весь израиль, и старцы их и судии их и книгочия их предходяху сюду и сюду пред кивотом, и жерцы и левити воздвизаша кивот завета Господня, пришелец же и туземец: иже быша половина их близ горы гаризин, и половина их близ горы гевал, якоже заповеда моисей раб Господень благословити людий израилевых в первых.

³⁴И по сих тако прочте иисус вся словеса закона сего, благословения и клятвы, по всему написанному в законе моисеове.

³⁵Не бяше словесе от всех, яже заповеда моисей иисусу, егоже не прочте иисус во уши всего сонма сынов израилевых, мужем и женам, и детем и пришелцем приходящым ко израилю.