Read Елизаветинская Библия, 1751 2-е Фессалоникийцам 3 Bible Online

2-е Фессалоникийцам 3 - Елизаветинская Библия, 1751 bible

2-е Фессалоникийцам 3

¹Прочее, молитеся о нас, братие, да слово Господне течет и славится, якоже и в вас,

²и да избавимся от злых и лукавых человек: не всех бо есть вера.

³Верен же есть Господь, иже утвердит вас и сохранит от лукаваго.

⁴Уповаем же на Господа о вас, яко, яже повелеваем вам, и творите и сотворите.

⁵Господь же да исправит сердца ваша в любовь Божию и в терпение Христово.

⁶Повелеваем же вам, братие, о имени Господа нашего Иисуса Христа, отлучатися вам от всякаго брата безчинно ходяща, а не по преданию, еже прияша от нас:

⁷сами бо весте, како лепо есть вам подобитися нам: яко не безчинновахом у вас,

⁸ниже туне хлеб ядохом у кого, но в труде и подвизе, нощь и день делающе, да не отягчим никогоже от вас:

⁹не яко не имамы власти, но да себе образ дамы вам, во еже уподобитися нам.

¹⁰Ибо егда бехом у вас, сие завещавахом вам: яко аще кто не хощет делати ниже да яст.

¹¹Слышим бо некия безчинно ходящыя у вас, ничтоже делающыя, но лукавно обходящыя:

¹²таковым запрещаем и молим о Господе нашем Иисусе Христе, да с безмолвием делающе, свой хлеб ядят.

¹³Вы же, братие, не стужайте, доброе творяще.

¹⁴Аще же кто не послушает словесе нашего посланием, сего назнаменуйте и не примешайтеся ему, да посрамится:

¹⁵и не аки врага имейте его, но наказуйте якоже брата.

¹⁶Сам же Господь мира да даст вам мир всегда во всяцем образе: Господь со всеми вами.

¹⁷Целование моею рукою павлею, еже есть знамение во всяцем послании: сице пишу:

¹⁸благодать Господа нашего Иисуса Христа со всеми вами. Аминь.