Read Елизаветинская Библия, 1751 1-е Тимофею 3 Bible Online

1-е Тимофею 3 - Елизаветинская Библия, 1751 bible

1-е Тимофею 3

¹Верно слово: аще кто епископства хощет, добра дела желает.

²Подобает убо епископу быти непорочну, единыя жены мужу, трезвену, целомудру, (благоговейну,) честну, страннолюбиву, учителну,

³не пиянице, не бийце, не сварливу, не мшелоимцу, но кротку, (не завистливу,) не сребролюбцу,

⁴свой дом добре правящу, чада имущу в послушании со всякою чистотою:

⁵аще же кто своего дому не умеет правити, како о Церкви Божией прилежати возможет?

⁶не новокрещенну, да не разгордевся в суд впадет диаволь.

⁷Подобает же ему и свидетелство добро имети от внешних, да не в поношение впадет и в сеть неприязнену.

⁸Диаконом такожде чистым, не двоязычным, не вину многу внимающым, не скверностяжателным,

⁹имущым таинство веры в чистей совести.

¹⁰И сии убо да искушаются прежде, потом же да служат, непорочни суще.

¹¹Женам такожде чистым, не клеветивым, (не навадницам,) трезвенным, верным во всем.

¹²Диакони да бывают единыя жены мужие, чада добре правяще и своя домы:

¹³ибо служившии добре степень себе добр снискают и многое дерзновение в вере, яже о Христе Иисусе.

¹⁴Сия пишу тебе, уповая приити к тебе скоро:

¹⁵аще же замедлю, да увеси, како подобает в дому Божии жити, яже есть Церковь Бога жива, столп и утверждение истины.

¹⁶И исповедуемо велия есть благочестия тайна: Бог явися во Плоти, оправдася в Дусе, показася ангелом, проповедан бысть во языцех, веровася в мире, вознесеся во славе.