Read Елизаветинская Библия, 1751 К Титу 2 Bible Online

К Титу 2 - Елизаветинская Библия, 1751 bible

К Титу 2

¹Ты же глаголи, яже подобает здравому учению:

²старцем трезвенным быти, честным, целомудренным, здравствующым верою, любовию, терпением:

³старицам такожде во украшении святолепным, не клеветивым, не вину многу порабощенным, доброучителным,

⁴да уцеломудрят юныя, мужелюбицам быти, чадолюбицам,

⁵целомудренным, чистым, домы добре правящым, благим, покаряющымся своим мужем, да не слово Божие хулится:

⁶юношы такожде моли целомудрствовати.

⁷О всем (же) сам себе подавая образ добрых дел, во учении независтное, честность, нетление,

⁸слово здравое, незазорное. да противный посрамится, ничтоже имея глаголати о нас укорно.

⁹Рабы, своим господем повиноватися, во всем благоугодным быти, не прекословным,

¹⁰не крадущым, но веру всяку являющым благу. да учение спасителя нашего Бога украшают во всем.

¹¹Явися бо благодать Божия спасителная всем человеком,

¹²наказующи нас, да отвергшеся нечестия и мирских похотей, целомудренно и праведно и благочестно поживем в нынешнем веце,

¹³ждуще блаженнаго упования и явления славы великаго Бога и спаса нашего Иисуса Христа,

¹⁴иже дал есть себе за ны, да избавит ны от всякаго беззакония и очестит себе люди избранны, ревнители добрым делом.

¹⁵Сия глаголи, и моли, и обличай со всяким повелением. да никтоже тя преобидит.