Read Елизаветинская Библия, 1751 К Евреям 10 Bible Online

К Евреям 10 - Елизаветинская Библия, 1751 bible

К Евреям 10

¹Сень бо имый закон грядущих благ, (а) не самый образ вещей, на всякое лето темиже жертвами, ихже приносят выну, никогдаже может приступающих совершити.

²Понеже престали бы быти приносимы, ни едину ктому имущым совесть о гресех служащым, единою очищенным.

³Но в них воспоминание грехов на коеждо лето бывает,

⁴невозможно бо крови юнчей и козлей отпущати грехи.

⁵Темже входя в мир, глаголет: жертвы и приношения не восхотел еси, тело же совершил ми еси:

⁶всесожжений и о гресе не благоволил еси.

⁷Тогда рех: се, иду: в главизне книжней написася о мне, еже сотворити волю твою, Боже.

⁸Выше глаголя: яко жертвы и приношения и всесожжений и о гресех не восхотел еси, ниже благоволил еси: яже по закону приносятся:

⁹тогда рече: се, иду сотворити волю твою, Боже. Отемлет первое, да второе поставит.

¹⁰О нейже воли освящени есмы принесением тела Иисус Христова единою.

¹¹И всяк убо священник стоит на всяк день служя и тыяжде множицею принося жертвы, яже никогдаже могут отяти грехов.

¹²Он же едину о гресех принес жертву, всегда седит о десную Бога,

¹³прочее ожидая, дондеже положатся врази его подножие ног его:

¹⁴единем бо приношением совершил есть во веки освящаемых.

¹⁵Свидетелствует же нам и дух святый, по реченному бо прежде:

¹⁶сей завет, егоже завещаю к ним по днех онех, глаголет Господь, дая законы моя на сердца их, и в помышлениих их напишу их:

¹⁷(таже глаголет Господь:) и грехов их и беззаконий их не имам помянути ктому.

¹⁸А идеже отпущение сих, ктому несть приношения о гресех.

¹⁹Имуще убо дерзновение, братие, входити во святая кровию Иисус Христовою, путем новым и живым,

²⁰егоже обновил есть нам завесою, сиречь Плотию своею,

²¹и иереа велика над домом Божиим,

²²да приступаем со истинным сердцем во извещении веры, окроплени сердцы от совести лукавыя и измовени телесы водою чистою:

²³да держим исповедание упования неуклонное, верен бо есть обещавый:

²⁴и да разумееваем друг друга в поощрении любве и добрых дел,

²⁵не оставляюще собрания своего, якоже есть неким обычай, но (друг друга) подвизающе, и толико паче, елико видите приближающийся день (судный).

²⁶Волею бо согрешающым нам по приятии разума истины, ктому о гресех не обретается жертва,

²⁷страшно же некое чаяние суда и огня ревность, поясти хотящаго сопротивныя.

²⁸Отверглся кто закона моисеова, без милосердия при двоих или триех свидетелех умирает:

²⁹колико мните горшия сподобится муки, иже Сына Божия поправый, и кровь заветную скверну возмнив, еюже освятися, и духа благодати укоривый?

³⁰Вемы бо рекшаго: мне отмщение, аз воздам, глаголет Господь. И паки: яко судит Господь людем своим.

³¹Страшно (есть) еже впасти в руце Бога живаго.

³²Воспоминайте же первыя дни вашя, в нихже просветившеся, многия страсти претерпесте страданий,

³³ово убо, поношеньми и скорбьми позор бывше, ово же, общницы бывше живущым тако:

³⁴ибо узам моим спострадасте и разграбление имений ваших с радостию приясте, ведяще имети себе имение на небесех пребывающее и лучшее.

³⁵Не отлагайте убо дерзновения вашего, еже имать мздовоздаяние велико.

³⁶Терпения бо имате потребу, да волю Божию сотворше, приимете обетование:

³⁷еще бо мало елико елико, грядый приидет и не укоснит.

³⁸А праведный от веры жив будет: и аще обинется, не благоволит душа моя о нем.

³⁹Мы же (братие) несмы обиновения в погибель, но веры в снабдение души.