Read Елизаветинская Библия, 1751 К Евреям 2 Bible Online

К Евреям 2 - Елизаветинская Библия, 1751 bible

К Евреям 2

¹Сего ради подобает нам лишше внимати слышанным, да не когда отпадем.

²Аще бо глаголанное ангелы слово бысть известно, и всяко преступление и ослушание праведное прият мздовоздаяние:

³како мы убежим, о толицем нерадивше спасении, еже зачало приемь глаголатися от Господа, слышавшими в нас известися,

⁴сосвидетелствующу Богу знаменьми же и чудесы, и различными силами, и духа святаго разделеньми, по своей ему воли?

⁵Не ангелом бо покори Бог вселенную грядущую, о нейже глаголем:

⁶засвидетелствова же негде некто, глаголя: что есть человек, яко помниши его? или сын человеческий, яко посещаеши и?

⁷умалил еси его малым нечим от ангел: славою и честию венчал еси его и поставил еси его над делы руку твоею,

⁸вся покорил еси под нозе его. Внегда же покорити ему всяческая, ничтоже остави ему непокорено. Ныне же не у видим ему всяческая покорена:

⁹а умаленаго малым чим от ангел видим Иисуса, за приятие смерти славою и честию венчанна, яко да благодатию Божиею за всех вкусит смерти.

¹⁰Подобаше бо ему, егоже ради всяческая и имже всяческая, приведшу многи сыны в славу, началника спасения их страданьми совершити.

¹¹И святяй бо и освящаемии, от единаго вси: еяже ради вины не стыдится братию нарицати их, глаголя:

¹²возвещу имя твое братии моей, посреде церкве воспою тя.

¹³И паки: аз буду надеяся нань. И паки: се, аз и дети, яже ми дал есть Бог.

¹⁴Понеже убо дети приобщишася плоти и крови, и той приискренне приобщися техже, да смертию упразднит имущаго державу смерти, сиречь диавола,

¹⁵и избавит сих, елицы страхом смерти чрез все житие повинни беша работе.

¹⁶Не от ангел бо когда приемлет, но от семене авраамова приемлет:

¹⁷отнюдуже должен бе по всему подобитися братии, да милостив будет и верен первосвященник в тех, яже к Богу, во еже очестити грехи людския.

¹⁸В немже бо пострада, сам искушен быв, может и искушаемым помощи.