Read Елизаветинская Библия, 1751 К Евреям 5 Bible Online

К Евреям 5 - Елизаветинская Библия, 1751 bible

К Евреям 5

¹Всяк бо первосвященник, от человек приемлемь, за человеки поставляется на службы яже к Богу, да приносит дары же и жертвы о гресех,

²спострадати могий невежствующым и заблуждающым, понеже и той немощию обложен есть:

³и сего ради должен есть якоже о людех, такожде и о себе приносити за грехи.

⁴И никтоже сам себе приемлет честь, но званный от Бога, якоже и аарон.

⁵Тако и Христос не себе прослави быти первосвященника, но глаголавый к нему: Сын мой еси ты, аз днесь родих тя:

⁶якоже и инде глаголет: ты еси священник во век по чину мелхиседекову.

⁷Иже во днех Плоти своея моления же и молитвы к могущему спасти его от смерти с воплем крепким и со слезами принес, и услышан быв от благоговеинства,

⁸аще и Сын бяше, обаче навыче от сих, яже пострада, послушанию,

⁹и совершився бысть всем послушающым его виновен спасения вечнаго,

¹⁰наречен от Бога первосвященник по чину мелхиседекову.

¹¹О немже многое нам слово и неудобь сказаемое глаголати, понеже немощни бысте слухи.

¹²Ибо, должни суще быти учителие лет ради, паки требуете учитися, кая писмена начала словес Божиих: и бысте требующе млека, а не крепкия пищи.

¹³Всяк бо причащаяйся млека неискусен слова правды, младенец бо есть:

¹⁴совершенных же есть твердая пища, имущих чувствия обучена долгим учением в разсуждение добра же и зла.