Read Елизаветинская Библия, 1751 К Евреям 7 Bible Online

К Евреям 7 - Елизаветинская Библия, 1751 bible

К Евреям 7

¹Сей бо мелхиседек, Царь салимский, священник Бога вышняго, иже срете авраама возвращшася от сеча царей и благослови его,

²емуже и десятину от всех отдели авраам, первее убо сказуется Царь правды, потом же Царь салимский, еже есть, Царь мира,

³без отца, без матере, без причта рода, ни начала днем, ни животу конца имея, уподоблен же Сыну Божию, пребывает священник выну.

⁴Видите же, елик сей, емуже и десятину дал есть авраам патриарх от избранных.

⁵И приемлющии убо священство от сынов левиин заповедь имут одесятствовати люди по закону, сиречь, братию свою, аще и от чресл авраамовых изшедшую:

⁶не причитаемый же родом к ним, одесятствова авраама и имущаго обетования благослови:

⁷без всякаго же прекословия меншее от болшаго благословляется.

⁸И зде убо десятины человецы умирающии приемлют: тамо же свидетелствуемый, яко жив есть.

⁹И да сице реку, авраамом и левий, приемляй десятины, десятины дал есть:

¹⁰еще бо в чреслех отчиих бяше, егда срете его мелхиседек.

¹¹Аще убо совершенство левитским священством было, людие бо на нем взаконени быша: кая еще потреба по чину мелхиседекову иному востати священнику, а не по чину ааронову глаголатися?

¹²прелагаему бо священству, по нужди и закону пременение бывает.

¹³О немже бо глаголются сия, колену иному причастися, от негоже никтоже приступи ко олтарю:

¹⁴яве бо, яко от колена иудова возсия Господь наш, о немже колене моисей о священстве ничесоже глагола.

¹⁵И лишше еще яве есть, яко по подобию мелхиседекову востает священник ин,

¹⁶иже не по закону заповеди плотския бысть, но по силе живота неразрушаемаго.

¹⁷Свидетелствует бо, яко ты еси священник во век по чину мелхиседекову.

¹⁸Отлагание убо бывает прежде бывшия заповеди за немощное ея и неполезное:

¹⁹ничтоже бо совершил закон: привведение же есть лучшему упованию, имже приближаемся к Богу.

²⁰И по елику не без клятвы:

²¹они бо без клятвы священницы быша, сей же с клятвою чрез глаголющаго к нему: клятся Господь и не раскается: ты еси священник во век по чину мелхиседекову:

²²по толику лучшаго завета бысть испоручник Иисус.

²³И они множайши священницы быша, зане смертию возбранени суть пребывати:

²⁴сей же, занеже пребывает во веки, непреступное имать священство,

²⁵темже и спасти до конца может приходящих чрез него к Богу, всегда жив сый, во еже ходатайствовати о них.

²⁶Таков бо нам подобаше архиерей: преподобен, незлобив, безсквернен, отлучен от грешник и вышше небес бывый,

²⁷иже не имать по вся дни нужды, якоже первосвященницы, прежде о своих гресех жертвы приносити, потом же о людских: сие бо сотвори единою, себе принес.

²⁸Закон бо человеки поставляет первосвященники, имущыя немощь: слово же клятвенное, еже по законе, Сына во веки совершенна.