Read Елизаветинская Библия, 1751 2-е Петра 1 Bible Online

2-е Петра 1 - Елизаветинская Библия, 1751 bible

2-е Петра 1

¹Симон петр, раб и посланник Иисус Христов, равночистную с нами получившими веру в правде Бога нашего и спаса Иисуса Христа:

²благодать вам и мир да умножится в познании Бога, и Христа Иисуса Господа нашего.

³Яко вся нам Божественныя силы его, яже к животу и благочестию, подана разумом призвавшаго нас славою и добродетелию.

⁴имиже честная нам и великая обетования даровашася, да сих ради будете Божественнаго причастницы естества, отбегше, яже в мире, похотныя тли:

⁵и в самое же сие, тщание все привнесше, подадите в вере вашей добродетель, в добродетели же разум,

⁶в разуме же воздержание, в воздержании же терпение, в терпении же благочестие,

⁷во блгочестии же братолюбие, в братолюбии же любовь.

⁸Сия бо сущая в вас и множащаяся, не праздных ниже безплодных сотворят вы в Господа нашего Иисуса Христа познание:

⁹емуже бо несть сих, слеп есть, мжай, забвение приемь очищения древних своих грехов.

¹⁰Темже паче, братие, потщитеся известно ваше звание и избрание творити: сия бо творяще, не имате согрешити никогдаже,

¹¹сице бо обилно приподастся вам вход в вечное Царство Господа нашего и спаса Иисуса Христа.

¹²Сего ради не обленюся воспоминати присно вам о сих, аще и ведите, и утверждени есте в настоящей истине.

¹³Праведно бо мню, донележе есмь в сем телеси, возставляти вас воспоминанием,

¹⁴ведый, яко скоро есть отложение телесе моего, якоже и Господь наш Иисус Христос сказа мне.

¹⁵Потщуся же и всегда имети вас по моем исходе память о сих творити.

¹⁶Не ухищренным бо баснем последовавше сказахом вам силу и пришествие Господа нашего Иисуса Христа, но самовидцы бывше величествия онаго.

¹⁷Прием бо от Бога Отца честь и славу, гласу пришедшу к нему от велелепныя славы. сей есть Сын мой возлюбленныи, о немже аз благоизволих.

¹⁸И сей глас мы слышахом с небесе сшедшь, с ним суще на горе святей.

¹⁹И имамы известнейшее пророческое слово: емуже внимающе якоже светилу сияющу в темнем месте, добре творите, дондеже день озарит, и денница возсияет в сердцах ваших,

²⁰сие прежде ведуще, яко всяко пророчество книжное по своему сказанию не бывает.

²¹Ни бо волею бысть когда человеком пророчество, но от святаго Духа просвещаеми глаголаша святии Божии человецы.