Read Елизаветинская Библия, 1751 1-е Иоанна 4 Bible Online

1-е Иоанна 4 - Елизаветинская Библия, 1751 bible

1-е Иоанна 4

¹Возлюбленнии, не всякому духу веруйте, но искушайте духи, аще от Бога суть: яко мнози лжепророцы изыдоша в мир.

²О сем познавайте Духа Божия и духа лестча: всяк дух, иже исповедует Иисуса Христа во Плоти пришедша, от Бога есть:

³и всяк дух, иже не исповедует Иисуса Христа во Плоти пришедша, от Бога несть: и сей есть антихристов, егоже слышасте, яко грядет, и ныне в мире есть уже.

⁴Вы от Бога есте, чадца, и победисте тех: яко болий есть иже в вас, нежели иже в мире.

⁵Они от мира суть: сего ради от мира глаголют, и мир тех послушает.

⁶Мы от Бога есмы: иже знает Бога, послушает нас, и иже несть от Бога, не послушает нас. О сем познаваем Духа истины и духа лестча.

⁷Возлюбленнии, возлюбим друг друга, яко любы от Бога есть, и всяк любяй от Бога рожден есть, и знает Бога:

⁸а не любяй не позна Бога, яко Бог любы есть.

⁹О сем явися любы Божия в нас, яко Сына своего единороднаго посла Бог в мир, да живи будем им.

¹⁰О сем есть любы, не яко мы возлюбихом Бога, но яко той возлюби нас, и посла Сына своего очищение о гресех наших.

¹¹Возлюбленнии, аще сице возлюбил есть нас Бог, и мы должни есмы друг друга любити.

¹²Бога никтоже нигдеже виде. Аще друг друга любим, Бог в нас пребывает, и любы его совершенна есть в нас.

¹³О сем разумеем, яко в нем пребываем, и той в нас, яко от Духа своего дал есть нам.

¹⁴И мы видехом и свидетелствуем, яко Отец посла Сына спасителя миру.

¹⁵Иже аще исповесть, яко Иисус есть Сын Божий, Бог в нем пребывает, и той в Бозе.

¹⁶И мы познахом и веровахом любовь, юже имать Бог к нам. Бог любы есть, и пребываяй в любви в Бозе пребывает, и Бог в нем пребывает.

¹⁷О сем совершается любы с нами, да дерзновение имамы в день судный, зане, якоже он есть, и мы есмы в мире сем.

¹⁸Страха несть в любви, но совершенна любы вон изгоняет страх, яко страх муку имать: бояйся же не совершися в любви.

¹⁹Мы любим его, яко той первее возлюбил есть нас.

²⁰Аще кто речет, яко люблю Бога, а брата своего ненавидит, ложь есть: ибо не любяй брата своего, егоже виде, Бога, егоже не виде, како может любити?

²¹И сию заповедь имамы от него, да любяй Бога любит и брата своего.