Read Елизаветинская Библия, 1751 Судьи 19 Bible Online

Судьи 19 - Елизаветинская Библия, 1751 bible

Судьи 19

¹И бысть в тыя дни не бяше царя во израили: и бысть муж левитин живый во стране горы ефремовы, и поя себе жену подложницу от вифлеема иудина:

²и разгневася нань подложница его, и отиде от него в дом отца своего в вифлеем иудин, и бе тамо четыри месяцы:

³и воста муж ея и иде вслед ея глаголати в сердце ея, обратити ю к себе и привести паки к себе: и отрок его с ним, и двое ослят: она же введе его в дом отца своего:

⁴и виде его отец отроковицы и изыде с веселием во сретение его, и удержа его тесть его отец отроковицы, и пребысть с ним три дни, и ядоша и пиша, и спаша тамо.

⁵И бысть в день четвертый, и о‹утреша заутра, и воста поити. И рече отец отроковицы к зятю своему: укрепи сердце твое укрухом хлеба, и по сем пойдете.

⁶И седоша, и ядоша оба вкупе и пиша. И рече отец отроковицы к мужу: иди ныне и преспи, и возблажает сердце твое.

⁷И воста муж поити: и понуди его тесть его, и седе, и пребысть тамо.

⁸И воста рано в пятый день да идет. И рече отец отроковицы: укрепи убо сердце твое хлебом, и пребуди дондеже преклонится день. И ядоша и пиша оба.

⁹И воста муж да идет сам и подложница его и отрок его. И рече ему тесть его отец отроковицы: се, уже преклонися день к вечеру, пребуди зде, и возблажает сердце твое, и о‹утреете утро в путь ваш, и отидеши в селение свое.

¹⁰И не изволи муж пребыти, и воста и отиде: и прииде даже прямо иевусу, сей есть Иерусалим, и с ним двое ослят с бремены, и подложница его с ним.

¹¹И приидоша до иевуса, и день преклонися к вечеру зело: и рече отрок ко господину своему: гряди убо, да уклонимся во град сей иевус и пребудем в нем.

¹²И рече к нему господин его: не уклонимся во град чуждь, в немже несть от сынов израилевых, но прейдем до гаваона.

¹³И рече ко отроку своему: гряди, да приступим ко единому от мест гаваонских и пребудем в гаваоне или в раме.

¹⁴И минуша, и идоша, и зайде им солнце близ гаваона, иже есть вениаминь:

¹⁵и уклонишася тамо внити превитати в гаваоне, и внидоша и седоша на стогнах града: и не бе муж вводяй их в дом превитати.

¹⁶И се, муж стар идяше с дела своего из поля в вечер, и сей муж от горы ефремли, и той обиташе в гаваоне: и мужие места сынове вениамини.

¹⁷И возвед очи свои, виде мужа путника на стогнах градных, и рече муж старец: камо идеши и откуду грядеши?

¹⁸И рече к нему: грядем мы от вифлеема иудина даже до стран горы ефремли, отюнудуже аз есмь: и ходих до вифлеема иудина, и иду аз в дом мой: и несть мужа вводящаго мя в дом:

¹⁹а плевы и пища ослятом нашым есть, и мне хлеб и вино есть, и отроковице и отроку: рабом твоим несть скудно ни коея вещи.

²⁰И рече муж стар: мир тебе: и весь недостаток твой на мне, обаче на стогнах не лязи.

²¹И введе его в дом свой, и даде место ослятом его: и омыша ноги своя, и ядоша и пиша.

²²Егда же возвеселися сердце их, и се, мужие градстии сынове беззаконников обыдоша дом биюще в двери, и реша мужу господину дому старцу, глаголюще: изведи мужа иже вниде в дом твой, да познаем его.

²³И изыде к ним муж господин дому и рече: ни, братия, не сотворите зла мужу сему повнегда внити ему в дом мой, и не сотворите безумия сего:

²⁴се, дщерь моя дева, и подложница его: изведу их, и смирите их, и сотворите им еже благо пред очима вашима: а мужу сему не сотворите словесе безумия сего.

²⁵И не изволиша мужие послушати его. И взя муж подложницу его и изведе ю к ним вон: и познаша ю и ругашася над нею всю нощь даже до утра, и отпустиша ю, егда взыде денница.

²⁶И прииде жена к заутрию, и паде у дверий дому, идеже бяше муж ея, до разсветания.

²⁷И воста муж ея заутра, и отверзе двери дому и изыде поити в путь свой: и се, жена его подложница лежаше при дверех дому, и руце ея на преддверии.

²⁸И рече к ней: востани, да идем. И не отвеща ему, бяше бо мертва. И возложи ю на осля, и воста муж и пойде на место свое.

²⁹И прииде в дом свой, и взя нож, и взя подложницу свою, и раздроби ю по удесем ея на дванадесять частей, и посла я во вся племена израилева.

³⁰И бысть всяк видящий глаголаше: не бысть, ни видено бе сице от дне изшествия сынов израилевых от земли египетския даже до дне сего. И заповеда мужем, ихже посла, глаголя: сице глаголите ко всему израилю: аще бысть по словеси сему? уставите сами себе о ней совет и глаголите.