Read Елизаветинская Библия, 1751 Судьи 3 Bible Online

Судьи 3 - Елизаветинская Библия, 1751 bible

Судьи 3

¹И сия языки, яже остави Господь, да искусит ими израиля, вся неведущыя браней ханаанских,

²токмо ради родов сынов израилевых, еже научити я брани, обаче иже прежде их не уведаша их:

³пять воеводств иноплеменнических, и всего хананеа и сидония, и евеа живущаго в ливане от горы ваал-ермон до лавоемафа.

⁴И бысть да искусит ими израиля, да увесть, аще послушают заповедий Господних, яже заповеда отцем их рукою моисеовою.

⁵И сынове израилевы обиташа посреде хананеа и хеттеа, и аморреа и ферезеа, и евеа и гергесеа и иевусеа,

⁶и пояша дщери их себе в жены, и дщери своя даша сыном их, и послужиша богом их.

⁷И сотвориша сынове израилевы злое пред Господем и забыша Господа Бога своего, и послужиша ваалу и дубравам.

⁸И разгневася яростию Господь на израиля и предаде их в руки хусарсафема царя месопотамии сирския: и работаша сынове израилевы хусарсафему лет осмь.

⁹И возопиша сынове израилевы ко Господу. И возстави Господь спасителя израилю, и спасе их, гофониила, сына кенеза брата халевова юнейшаго его.

¹⁰И бысть на нем Дух Господень, и суди израиля. И изыде на рать к хусарсафему: и предаде Господь в руце его хусарсафема царя сирска, и укрепися рука его над хусарсафемом.

¹¹И бысть в покои земля четыредесять лет. И умре гофониил сын кенезов.

¹²И приложиша сынове израилевы сотворити злое пред Господем: и укрепи Господь еглома царя моавля на израиля, занеже сотвориша злое пред Господем.

¹³И собра к себе вся сыны аммони и амаликовы: и иде, и порази израиля, и взя град финическ.

¹⁴И работаша сынове израилевы еглому царю моавлю лет осмьнадесять.

¹⁵И возопиша сынове израилевы ко Господу: и возстави им Господь спасителя, аода сына гираня, сына иемениина, мужа ободесноручна: и послаша сынове израилевы дары рукою его еглому царю моавлю.

¹⁶И сотвори себе аод нож обоюдуостр, на пядь едину долгота его, и припояса его под ризу по бедре десней своей.

¹⁷И иде, и принесе дары еглому царю моавлю: еглом же муж добротелесен бе зело.

¹⁸И бысть егда сконча аод принося дары, и отсла носящих дары:

¹⁹и еглом обратися от идол иже в галгалех. И рече аод: слово мне есть к тебе тайно, царю. И рече еглом к нему: молчи. И отсла от себе всех предстоящих пред ним.

²⁰И аод вниде к нему. Сей же седяше в горнице летней своей един. И рече аод: слово Божие мне к тебе, царю. И воста еглом со престола близ его.

²¹И бысть егда воста, и простре аод руку левую свою, и извлече нож, иже над стегном его десным, и вонзе во чрево егломово:

²²и втисне и рукоять за острием, и заключи тук за острием, яко не извлече ножа из чрева его, (и изыде лайно).

²³И изыде аод в притвор, и пройде стрегущих, и затвори двери горницы за собою и заключи,

²⁴и сам изыде. И раби его приидоша и узреша, и се, двери горницы заключены, и реша: еда у потребы седит во отлучении ложа?

²⁵И преждаша дондеже посрамишася: и се, не бысть отверзаяй двери горницы. И взяша ключь, и отверзоша: и се, господин их лежит на земли мертв.

²⁶И аод спасеся внегда смущахуся, и не бе помышляющаго о нем: а он прейде идолы, и спасеся в сетирофе.

²⁷И бысть егда прииде аод в землю израилеву, и воструби рогом в горе ефремли: и снидоша с ним с горы сынове израилевы, и той пред ними.

²⁸И рече к ним: идите вслед мене, яко предаде Господь Бог враги нашя моавляны в руки нашя. И идоша вслед его, и предвзяша преходы иордана моавля, и ни единому мужу попустиша преити.

²⁹И избиша моава в то время яко десять тысящ мужей, вся воины, иже в них, и всякаго мужа сильна: и ни един муж спасеся.

³⁰И пременися моав в той день под руку израилеву, и бысть в покои земля осмьдесят лет: и суди их аод дондеже умре.

³¹И по нем воста самегар сын анафов: и изби иноплеменников шесть сот мужей ралом воловым: и спасе и сей израиля.