Read Елизаветинская Библия, 1751 Судьи 6 Bible Online

Судьи 6 - Елизаветинская Библия, 1751 bible

Судьи 6

¹И сотвориша сынове израилевы злое пред Господем, и предаде их Господь в руку мадиамлю седмь лет.

²И укрепися рука мадиамля на израиля: и сотвориша себе сынове израилевы от лица мадиамля ограды в горах и в пещерах и в твердынех.

³И бысть егда сеяше муж израилев, и восхождаше мадиам и амалик и сынове восточнии, и восхождаху на него,

⁴и ополчахуся на них, и разоряху плоды земныя, дондеже внити в газу: и не оставляху бытия жизненнаго во израили, и стад и телца и осла:

⁵яко сами и скоти их восхождаху, и кущы их преношаху, и прихождаху яко прузи множеством, и самем и велблюдом их не бяше числа: и прихождаху на землю израилеву разорити ю.

⁶И обнища израиль зело от лица мадиамля.

⁷И возопиша сынове израилевы ко Господу: и бысть егда возопиша сынове израилевы ко Господу мадиама ради,

⁸и посла Господь мужа пророка к сыном израилевым, и рече им: сия глаголет Господь Бог израилев: аз есмь изведый вас из египта, и изведох вас из дому работы:

⁹и избавих вас от руки египетския и от руки всех стужающих вам: и изгнах я от лица вашего, и дах вам землю их,

¹⁰и рекох вам: аз есмь Господь Бог ваш, не убойтеся богов аморрейских, в нихже вы живете в земли их: и не послушасте гласа моего.

¹¹И прииде ангел Господень, и седе под дубом, иже есть во ефрафе, иже бысть иоаса отца езри. И гедеон сын его млачаше пшеницу на гумне его, бежати от лица мадиамля.

¹²И явися ему ангел Господень и рече к нему: Господь с тобою, сильный крепостию.

¹³И рече к нему гедеон: во мне, Господи мой: и аще есть Господь с нами, и вскую обретоша ны вся злая сия? и где суть вся чудеса его, елика поведаша нам отцы наши, глаголюще: не из египта ли изведе нас Господь? и ныне отверже нас Господь и предаде нас в руку мадиамлю.

¹⁴И воззре на него ангел Господень и рече ему: иди в крепости твоей сей, и спасеши израиля от руки мадиамли: и се, послах тя.

¹⁵И рече к нему гедеон: во мне, Господи, в чесом спасу израиля? се, тысяща моя хуждша в манассии, и аз есмь мний в дому отца моего.

¹⁶И рече к нему Господь: понеже аз буду с тобою, и избиеши мадиама яко мужа единаго.

¹⁷И рече к нему гедеон: и аще обретох благодать пред очима твоима, и да сотвориши мне днесь знамение, яко ты глаголеши со мною:

¹⁸не отиди отсюду, дондеже приити мне к тебе, и принесу жертву мою, и пожру пред тобою. И рече: аз есмь, премедлю, дондеже обратишися ты.

¹⁹И гедеон вниде, и сотвори козлище от коз, и четверть ифи муки опресноков, и мяса вложи в кошницу, и юху влия в горнец: и изнесе к нему под дуб, и поклонися.

²⁰И рече к нему ангел Господень: возми мяса и хлебы пресныя, и положи у камене онаго, и юху близ излий. И сотвори тако.

²¹И простре ангел Господень конец жезла, иже в руце его, и прикоснуся мясом и хлебом пресным: и возгореся огнь из камене, и пояде мяса и опресноки: и ангел Господень отиде от очей его.

²²И виде гедеон, яко ангел есть Господень, и рече гедеон: увы мне, Господи, Господи, яко видех ангела Господня лицем к лицу.

²³И рече ему Господь: мир тебе, и не бойся, не умреши.

²⁴И созда тамо гедеон жертвенник Господу, и назва его мир Господень, даже до дне сего, еще сущу ему во ефрафе отца езри.

²⁵И бысть в ту нощь, и рече ему Господь: возми телца упитаннаго (от скотов) отца твоего, и телца втораго седми лет, и разориши олтарь ваалов, иже есть отца твоего, и дубраву, яже у него, да посечеши:

²⁶и да соградиши олтарь Господеви Богу твоему явившемуся тебе на верху (горы) маози во предчинии: и да поймеши телца втораго и вознесеши всесожжения на древех дубравы, юже посечеши.

²⁷И поя гедеон десять мужей от рабов своих, и сотвори, якоже заповеда ему Господь. И бысть яко убояся дому отца своего и мужей града, еже сотворити во дни, и сотвори нощию.

²⁸И обутреневаша мужие градстии заутра: и се, раскопан олтарь ваалов, и дубрава яже у него посечена, и видеша телца втораго вознесена на всесожжение на олтарь новосогражденный.

²⁹И рече муж к ближнему своему: кто сотвори вещь сию? И вопрошаху и искаху, и познаша, яко гедеон сын иоасов сотвори вещь сию.

³⁰И рекоша мужие градстии ко иоасу: изведи сына твоего, и да умрет, яко раскопа олтарь ваалов и яко посече дубраву яже над ним.

³¹И рече иоас к мужем воставшым на него: еда вы ныне суд глаголете о ваале? или вы его спасете? иже аще кто сотвори обиду, да умрет до заутрия: аще Бог есть, да мстит себе, яко раскопа олтарь его.

³²И прозва его в той день иероваалом, глаголя: да отмстит на нем ваал, яко раскопа олтарь его.

³³И весь мадиам и амалик и сынове востоков снидошася вкупе, и преидоша (реку), и ополчишася в долине иезраель.

³⁴И Дух Божий укрепи гедеона, и воструби рогом, и возопи авиезер вслед его.

³⁵И посла послы ко всему манассию, и созвася и сей вслед его. Посем посла послы во асир и в завулон и в неффалим, и взыдоша во сретение им.

³⁶И рече гедеон к Богу: аще ты спасаеши рукою моею израиля, якоже глаголал еси,

³⁷се, аз положу руно овчее на гумне: и аще будет роса на руне точию, и по всей земли суша, уразумею, яко спасеши рукою моею израиля, якоже глаголал еси.

³⁸И бысть тако: и урани гедеон наутрие, и исцеди руно, и истече роса из руна, исполнен окрин воды.

³⁹И рече гедеон к Богу: да не разгневается ярость твоя на мя, и возглаголю еще единою, и искушу еще единою руном: да будет суша на руне токмо, и по всей земли да будет роса.

⁴⁰И сотвори Бог тако в нощи той: и бысть суша на руне токмо, и по всей земли бысть роса.