Read Елизаветинская Библия, 1751 Руфь 3 Bible Online

Руфь 3 - Елизаветинская Библия, 1751 bible

Руфь 3

¹Рече же ей ноемминь свекровь ея: дщи (моя), не поищу ли тебе покоя, да благо ти будет?

²и ныне вооз не ужик ли нам, идеже со отроковицами его была еси? се, той веет на гумне ячмень сея нощи:

³ты же измыйся, и помасти лице твое, и облецыся в ризы твоя (светлыя), и изыди на гумно: не явися мужу, дондеже скончает ясти и пити:

⁴и будет внегда уснути ему, и познаеши место, где ляжет, тамо да внидеши, и открыеши у ног его, и ляжеши: и той повесть тебе, яже имаши творити.

⁵И рече руфь к ней: вся елика речеши мне, сотворю.

⁶И иде на гумно, и сотвори по всему, елика заповеда ей свекровь ея.

⁷И яде вооз и пи, и возблажа сердце его, и иде спати со страны стога: она же прииде втай, и откры яже у ног его, и ляже.

⁸И бысть в полунощи, ужасеся муж и возмятеся, и се, жена лежит у ног его:

⁹и рече (ей вооз): кто еси ты? Она же рече: аз есмь руфь раба твоя, да возложиши крило твое на рабу твою, яко ужик ты еси.

¹⁰И рече вооз: благословена ты Господем Богом, дщи, яко разблажила еси милость твою последнюю паче первыя, еже не ити тебе вслед юнот, аще убог, аще богат:

¹¹и ныне, дщи, не бойся: вся елика речеши, сотворю тебе: весть бо все племя людий моих, яко жена силы ты еси:

¹²и ныне поистинне ужик есмь аз: но еще есть ужик ближший мене:

¹³прележи сию нощь, и будет заутра аще приимет тя, то благо: да поймет: аще ли не восхощет пояти тебе, то поиму тя аз, жив Господь: прележи до заутрия.

¹⁴И лежа у ног его до заутрия: она же воста, прежде неже познати мужу подруга своего. И рече вооз: да не увестся, яко приходила жена на гумно.

¹⁵И рече ей: принеси покрывало еже на тебе, и держи е. Она же держа е, и намери ей шесть мер ячменя, и заде ей: и иде во град.

¹⁶И прииде руфь ко свекрови своей. Она же рече ей: что есть, дщи? И поведа ей вся, елика сотвори ей муж.

¹⁷И рече ей: шесть мер сих ячменя даде ми, глагола бо ко мне: да не идеши тща ко свекрови своей.

¹⁸Она же рече: седи, дщи, дондеже увеси, како падет слово: не умолчит бо муж, дондеже совершится слово днесь.