Read Елизаветинская Библия, 1751 1-я Царств 10 Bible Online

1-я Царств 10 - Елизаветинская Библия, 1751 bible

1-я Царств 10

¹И взя самуил сосуд с елеем, и возлия на главу его, и лобыза его, и рече ему: не помаза ли тебе Господь на царство людем своим иже во израили? и ты царствовати будеши в людех Господних, и ты спасеши я от руки враг их окрест: и сие тебе знамение, яко помаза тя Господь над наследием своим в князя:

²егда отидеши днесь от мене, обрящеши два мужа при гробех рахилиных в пределех вениаминих в силоме, в вакалафе скачущих зелно, и рекут тебе: обретошася ослята, ихже ходисте искати: и се, отец твой отверже глагол о ослятех и зело печется вас ради, глаголя: что сотворю о сыне моем?

³и отидеши оттуду, и далее приидеши до дубравы фавора, и обрящеши тамо три мужы восходящыя к Богу в вефиль, единаго ведуща трое козлят, а другаго несуща три вретища хлебов, а третияго несуща мех вина:

⁴и вопросят тя яже о мире, и дадут ти два начатка хлебов, и возмеши от рук их:

⁵и по сих да взыдеши на холм Божий, идеже есть собрание иноплеменник, тамо началницы иноплеменничи: и будет егда внидеши тамо во град, срящеши лик пророков исходящих от вамы, и пред ними свирели и тимпаны, и сопели и гусли, и тии прорицающии:

⁶и снидет на тя дух Господень, и воспророчествуеши с ними, и обратишися в мужа иного:

⁷и будет егда приидут знамения сия на тя, твори вся, елика обрящет рука твоя, яко Бог с тобою:

⁸и снидеши прежде мене в галгалы, и се, аз сниду к тебе вознести всесожжение и пожрети жертвы мирны: седмь дний пождеши, дондеже прииду к тебе, и покажу ти, что сотвориши.

⁹И бысть внегда отвратити ему плещы своя отити от самуила, преложи ему Бог сердце на ино. И приидоша вся знамения сия в день он.

¹⁰И взыде оттуду на холм, и се, лик пророческий противу ему: и взыде нань дух Божий, и прорицаше среде их.

¹¹И быша вси видевшии его вчера и третияго дне, и видеша, и се, той посреде пророк прорицаяй. И реша людие кийждо ко искреннему своему: что сие бывшее сыну кисову? еда и саул во пророцех?

¹²И отвеща некто от них и рече: и кто отец ему? не кис ли? И сего ради бысть в притчу: еда и саул во пророцех?

¹³И сконча пророчествуя, и прииде оттуду на холм.

¹⁴И рече ужик его к нему и ко отрочищу его: камо ходисте? И реша: ослят искати, и видехом, яко несть их, и внидохом к самуилу.

¹⁵И рече ужик к саулу: возвести ми ныне, что ти рече самуил?

¹⁶И рече саул ужику своему: вестию возвести ми, яко обретошася ослята. Словесе же о царстве не возвести ему, еже рече самуил.

¹⁷И заповеда самуил всем людем приити ко Господу в массифаф.

¹⁸И рече самуил к сыном израилевым: сия рече Господь Бог израилев, глаголя: аз изведох отцы вашя сыны израилевы из египта, и изях вы от руки фараона царя египетскаго и от всех царств оскорбляющих вы:

¹⁹и вы днесь уничижисте Бога вашего, иже сам есть спасаяй вы от всех зол ваших и скорбей ваших, и ресте: ни, но царя да поставиши над нами: и ныне станите пред Господем по хоругвам вашым и по племенем вашым и по тысящам вашым.

²⁰И приведе самуил вся колена израилева, и паде жребий на хоругвь вениаминю.

²¹И приведе хоругвь вениаминю по племенам, и паде жребий на племя маттариино: и приведоша племя маттариино по мужем, и паде жребий на саула сына кисова: и искаху его, и не обреташеся.

²²И вопроси самуил еще Господа, глаголя: аще приидет семо муж еще? И рече Господь: се, той сокрыся в сосудех.

²³И тече самуил, и взя его оттуду, и постави его посреде людий: и бысть вышше всех людий, от рамен и вышше.

²⁴И рече самуил ко всем людем: видесте ли, егоже избра себе Господь, яко несть подобен ему во всех вас? И познаша вси людие и реша: да живет царь.

²⁵И рече самуил к людем оправдания царствия, и написа в книзе, и положи пред Господем.

²⁶И отпусти самуил вся люди, и идоша кийждо во своя си, и саул иде в дом свой в гаваю: и идоша с ним сынове сил, ихже коснеся Господь сердец их, с саулом.

²⁷Сынове же погибелнии реша: кто спасет нас, сей ли? И безчествоваша его, и не принесоша ему даров.